Opozita protestoi sot përpara Kryeministrisë, ku kërkoi largimin e kryeministrit Edi Rama dhe zv/kryeministres Belinda Balluku, e cila ndodhet nën hetim nga SPAK për aferën e Tunelit të Llogarasë.
Kreu i Partisë Demokratike, Sali Berisha, u shpreh se ky tubim shënon “Foltore 2”, një platformë parlamentaro-qytetare ku sipas tij opozita synon të “shpëtojë Shqipërinë nga regjimi i krimit”, siç e quan ai, dhe të kërkojë llogari për aferat dhe keqmenaxhimin e qeverisë.
Ai e përshkroi qeverinë si një “narko-shtet” dhe akuzoi kryeministrin dhe Ballukun për plaçkitje dhe politikë që ka shkaktuar largimin e qytetarëve dhe skamje në vend.
Në fjalën e tij, ish-kryeministri akuzoi Edi Ramën dhe bashkëpunëtorët e tij për krime ndaj shqiptarëve, duke thënë se politikat e tyre kanë detyruar më shumë qytetarë të largohen nga vendi se çdo pushtues në historinë kombëtare.
“Në këtë foltore parlamento-qytetar dhe kudo që jeni, të dashur demokrat, mbështetës të opozitës, parlamentarë. Miqtë emi, liria është si një lumë. Të cilin në asnjë lloj përpjekje nuk mund ta ndalësh, nuk mund ta përthash. O guxove ta bllokosh, ajo do çajë një kanal. Pikërisht, kjo është platforma parlamentaro-qytetar, që inagurojmë sot, para pallatit të krimit. Para pallatit të krimit shtetëror, ndaj shtetit shqiptar.
Zëvendësimit të tij me narko-shtetin. Para pallatit të krimit njerëzor, ndaj shqiptarëve që me qëndrimet e tij përzuri nga Shqipëria në vitet e qeverisjes së tij më shumë se çdo pushtues i egër në tërë historinë kombëtare. Para pallatit që me krim monstruoz i zvogëloi dhe i riktheu 100 vite prapa. Para pallatit që ka brenda diktatorin, sulltanin dhe sulltaneshën, Edvinin dhe Lubinë, që me vjedhjen dhe plaçkitjen e tyre kanë mbjellë skamje në këtë vend si në asnjë vend tjetër të kontinentit.
Përpjekjet e opozitës, për zgjedhje dhe rotacion, u përballën me tonelatat e eurove të drogës. U përballën me ushtrinë terroriste të patronazhistëve, terroristë të votës, me të gjithë burimet financiare, njerëzore, logjistike dhe të gjithanshme të shtetit mafioz, të narko-shtetit. Vetëm e vetëm se rotacioni dhe largimi nga pushteti i tyre është tmerr nga krimet që kanë kryer.” – tha Berisha.
Berisha: Rama i pamëshirë! Deklaroi se të sëmurët me kancer mbetën pa ilaçe se ishin shumë
Berisha kritikoi gjithashtu mungesën e ilaçeve për pacientët me kancer, duke akuzuar se fondet që duhej të shkonin për shëndetësinë përdoren për interesa personale dhe luks.
Berisha kujtoi se interpelanca e kërkuar me ministren e Shëndetësisë u hodh poshtë, duke i mohuar qytetarëve shpjegime për mungesën e barnave.
Sipas tij, Rama dy ditë më vonë deklaroi se pacientët me kancer mbetën pa trajtim për shkak se ishin shumë dhe buxheti nuk kishte fonde të mjaftueshme.
“U hodh poshtë interpelanca me ministren e Shëndetësisë që duhet t’u shpjegonte qytetarëve pse mbetën në kthetrat e vdekjes shqiptarët me sëmundje të rënda për shkak të ilaçeve. Dy ditë më vonë, Edi Rama, me cinizmin më ekstrem, deklaroi se të sëmurët me kancer mbetën pa mjekime se ata ishin shumë dhe ne nuk kishim para.
A ka krim më të shëmtuar se ky? Sigurisht që para kishte, dhe jo aq sa kërkonin ata, por ju garantoj se kishin 10 herë më shumë. Mungesa e atyre ilaçeve përbën një krim, por paratë i përdor Rama për t’i depozituar në banka ofshor, për të udhëtuar më avion taksi 22 milionë euro. Paratë i përdor ai për të blerë makina luksoze, shishe verë 34 mijë euro. I transporton me avionin e tij dhe për të sëmurët nuk mbeten para, por dënimi i asaj sëmundjeje. Ndaj e mbyll parlamentin se do që këtë të mos thuhen dhe të mos i marrin vesh qytetarët.” – tha Berisha.
Berisha: Nuk e pranojmë ligjin për Barazinë Gjinore
Gjithashtu Berisha tha se opozita nuk do të pranojë kurrë ligjin për Barazinë Gjinore, i cili u miratua në Kuvend me votat e socialistëve.
Berisha tha se ligji shkatërron vlerat e familjes. Ai akuzoi kryeministrin Edi Rama dhe zv/kryeministren Belinda Balluku se po kërkojnë të shkatërrojnë institucionin e familjes.
“Atë ligj shqiptarët nuk do ta pranojnë kurrë. Po u shpërbe familja, Shqipëria shpërbehet, kombi shpërbehet. Atë ligj nuk do e pranojmë kurrë. Familja shqiptare, institucioni më i shenjtë i çdo shqiptari. Kjo familje këtë komb e ka sjellë gjerë në ditët e sotme nga lashtësia. Këtë familje Rama dhe Lubia kërkojnë ta shkatërrojnë. Kjo familje do mbrohet me çdo çmim”, tha Berisha.
Këlliçi: Aksioni jonë mbaron kur të dërgojmë Ballukun dhe Ramën tek Erion Veliaj
Deputeti demokrati Belind Këlliçi, në fjalën e tij gjatë tubimit, tha se në foltore të re do faktohet vjedhja e tunelit të Llogarasë dhe vjedhjet e përditshme ndaj qytetarëve.
“Arsyeja pse foltorja do i dalë, kemi dy precedentë, foltoren e parë në shtator 2021, ku Shqipëria kërcënohej të lihej pa opozitë. Riktheu shpresën në PD dhe i doli të shpëtojë opozitën brenda 3 muajsh. Nisi me 1/100 të njerëzve këtu dhe përfundoi në Kuvendin e Rithemelimit në Air Albania. Riktheu shpresën qytetarëve. Ka një precedent të dytë në 14 maj 2023, u organizuan zgjedhjet më të pabarabarta në Shqipëri. Kandidatët opozitës garuan pa fonde, pa minuta mediatikë, morën 500 mijë vota. Nisëm protesta para bashkisë Tiranë në prill 2024, për 44 javë kemi protestuar, jemi përbaltur, goditur, nuk lënë gjë pa shpifur. Protesta i doli që për 11 muajsh Erion Veliajn ta përcillte në burgun e Durrësit.
Kush ka pikëpyetje i bëj me dije se përfundimi i aksionit politik Belinda Balluku dhe Rama do shkojnë te miku Erion Veliaj. Nuk e ndalim protestën. Do dalin të vërteta që për 2 muaj na janë mohuar në parlament, na është mohuar mocioni me debat. Është vendosur një rekord i paprecedent. Është përjashtuar Berisha për një deklaratë të tij jashtë parlamentit. Ju japim fjalën se njëlloj siç nuk jemi tërhequr në kauzën e bashkisë Tiranë, faktuam atë çka denoncuam në media, sërish me këtë aksion do faktojmë vjedhjen monstruoze të tunelit të Palloshit të BB. Do faktojmë edhe vjedhjen e përditshme ndaj qytetarëve.” – tha Këllici.
Protestuesit mbanin pankarta kundër Ramës dhe Ballukut, duke kërkuar drejtësi dhe transparencë për aferat financiare dhe vendimet e qeverisë.
Në përmbyllje të protestës, Sali Berisha, njoftoi protestën e radhës, e cila do të mbahet të hënën tjetër në të njëjtën vendndodhje.
