Policia e Tiranës ka goditur një tentativë për trafikim të pjesëve të armëve të zjarrit që vinin nga Shtetet e Bashkuara të Amerikës përmes shërbimeve postare.
Blutë kanë arrestuar në flagrancë 32-vjeçarin Eni Hoxha, i cili u kap në momentin kur po tërhiqte pakon në një prej zyrave postare në rrugën “Asim Vokshi”.
Gjatë kontrollit, autoritetet sekuestruan një tytë arme, një silenciator, dy krehra dhe komponentë të tjerë armësh, së bashku me dy celularë.
“Si rezultat i hetimeve dhe veprimeve të shpejta operacionale, të kryera pas indicieve për një rast të trafikimit të pjesëve të armëve të zjarrit, nëpërmjet shërbimit postar, nga ShBA-ja në Shqipëri, specialistët e Seksionit për Hetimin e Trafiqeve finalizuan operacionin e koduar “Delivery”.
Në kuadër të operacionit u arrestua në flagrancë shtetasi E. H., 32 vjeç, banues në Tiranë, teksa merrte një pako me pjesë armësh, në një degë postare në rrugën “Asim Vokshi”. Pjesët e gjetura në pako dyshohet se janë trafikuar nga ShBA-ja. Hetimi vijon për të nxjerrë përpara përgjegjësisë penale, shtetas të tjerë që mund të jenë përfshirë në këtë rast.”– njofton policia.
Materialet procedurale iu referuan Prokurorisë së Tiranës, për veprime të mëtejshme.
