I burgosuri Bledar Selmanaj, i akuzuar për vrasjen e 25-vjeçarit Xhulian Bullarit në vitin 2021, tentoi sot të arratiset nga Burgu i Fierit, por u kap nga gardianët para se të largohej nga rrethimi i burgut.
Ky nuk është rasti i parë që Selmanaj tenton të largohet nga institucionet korrektuese. Në shtator të vitit 2021, ai tentoi të arratisej nga spitali i burgut në Tiranë, ku ishte transferuar nga burgu i Peqinit për arsye shëndetësore. Gjithashtu, në gusht të vitit 2021, ai ka tentuar vetëvrasjen gjatë qëndrimit në burg dhe rezulton se vuante nga probleme të shëndetit mendor.
Selmanaj u arrestua më 21 gusht 2021 në zonën e ish-Bllokut në Tiranë, katër ditë pas ekzekutimit të Xhulian Bullarit në aksin Vlorë-Babicë. Viktima u gjet e vdekur në një makinë tip Fiat Punto, ku sipas ekspertizës u qëllua me tre plumba, duke marrë një goditje në kokë që i shkaktoi vdekjen e menjëhershme.
Shkak për vrasjen dyshohet të jenë bërë mosmarrëveshjet për pazare droge. Sipas hetimeve, autori dhe viktima njiheshin më parë dhe kishin bashkëpunuar në aktivitetin kriminal. Konflikti ka nisur për një pagesë prej 3 mijë eurosh me euro false, në një marrëveshje për shitjen e rreth 100 kg hashash në Elbasan.
LEXO EDHE:
I dënuar për v*asje, Bledar Selmanaj tenton të arratiset nga burgu i Fierit
