Një 36-vjeçar shqiptar, i kërkuar nga autoritetet italiane për pjesëmarrje në një organizatë kriminale që kryente vjedhje banesash dhe përvetësim të mallrave të vjedhura, u kap në Spanjë dhe u dorëzua mëngjesin e së mërkurës autoriteteve italiane.
Mediat italiane raportojnë se shqiptari u shoqërua nga policia në Aeroportin Linate të Milanos dhe më pas dërgua në paraburgim.
Urdhëri i arrestit ishte lëshuar si pjesë e hetimeve të koordinuara nga Zyra e Prokurorit Publik të Milanos, të cilat përfunduan në dhjetor 2024 me arrestimin e dy shqiptarëve të tjerë të akuzuar për të njëjtat vepra.
Hetimet zbuluan se banda, ku ai ishte pjesë, grabiste shtëpi dhe vila, duke përdorur makina luksoze të vjedhura për lëvizjet e tyre.
Sipas autoriteteve, grupi funksiononte sipas një protokolli të mirëorganizuar: anëtarët identifikonin paraprakisht banesat për t’u grabitur dhe ndanin qartë detyrat mes tyre. Ata shfrytëzonin edhe aftësinë për të hapur dyert e hyrjes me çelësa të falsifikuar.
Vetëm në muajin nëntor 2024, grupit i atribuohen të paktën 12 vjedhje, të zbuluara falë shërbimeve të vëzhgimit dhe analizës së bisedave të përgjuara brenda automjeteve që përdorte banda.
Dy anëtarë të grupit ishin arrestuar më parë në provincën Monza Brianza, ndërsa shqiptari i kapur së fundmi qëndroi në arrati për rreth 8 muaj para se të lokalizohej në Spanjë.
