Në vend vazhdojnë të jenë aktive 30 vatra zjarri në disa qarqe, duke përfshirë Vlorën, Lezhën, Dibër, Berat, Tiranë, Durrës, Gjirokastër, Elbasan, Shkodër dhe Kukës.
Në Vlorë, zjarret kanë përfshirë fshatra si Krane, Bolenë, Tërbaç dhe Lukovë, ndërsa situata në Poliçan është përkeqësuar me evakuime në disa zona për shkak të flakëve pranë banesave.
Në Lezhë dhe Mirditë vijon të jetë aktive zjarri në fshatra të ndryshëm, ndërsa në Dibër dhe Bulqizë po punohet për të kontrolluar flakët në zona malore.
Në Tiranë, Mali i Bërzhitës dhe Zona Arbanë janë prekur nga flakët, ku po punohet intensivisht për shuarjen e tyre, duke përfshirë edhe ndërhyrje ajrore me avionë Canadair nga Kroacia.
Në Gjirokastër, zjarri ka kaluar në fshatin Lekël të Tepelenës, pa shkaktuar dëme për banorët, por situata mbetet e vështirë në zonat përreth.
