Qytetarët kanë nisur të mblidhen këtë mbrëmje në sheshin “Skënderbej”, për të vijuar protestën qytetare që po zhvillohet tashmë prej 57 ditësh radhazi në kryeqytet.
Aktivistë, përfaqësues të grupeve qytetare dhe qytetarë nga zona të ndryshme të vendit po i bashkohen tubimit, duke ritheksuar kërkesat e tyre dhe duke deklaruar se do ta vazhdojnë protestën deri në plotësimin e tyre.
Pas grumbullimit në sheshin “Skënderbej”, protestuesit pritet të marshojnë drejt godinës së Kryeministrisë, ku do të mbajnë fjalime dhe do të shprehin qëndrimet e tyre lidhur me situatën politike dhe sociale në vend.
Më pas, marshimi pritet të vijojë në disa nga rrugët kryesore të Tiranës.
Kjo është dita e 57-të e protestës së pandërprerë në kryeqytet, ndërsa organizatorët kanë bërë të ditur se mobilizimi do të vijojë edhe në ditët në vijim, duke theksuar se nuk do të tërhiqen nga kërkesat e tyre deri në arritjen e një reagimi institucional.
