Gazetarja Alba Kepi, për hetimet në Itali ndaj arkitektit italian Stefano Boeri dhe lidhjen e tij me Edi Ramën, thotë se gjithçka ka të bëjë me afera korruptive.
Në një intervistë për MCN, ajo deklaroi se emri i kryeministrit shqiptar përmendet si i lidhur me Boerin, pasi në vitin 2017, ishte Edi Rama ai që prezantoi masterplanin “Tirana 2030” nën emrin e arkitektit italian, por që siç tha ajo rezultoi një flluskë.
Sipas saj, masterplani “Tirana 2030” është ideja e një Tirane të betonuar, e projektuar për të rritur vlerën e metrit katror të ndërtimit dhe për të fituar ai investitor që është i lidhur me kapitale të errëta.
“Është hera e tretë që brenda dy vitesh arkitekti Stefano Boeri që ka projektuar vizionin “Tirana 2030” është vënë nën akuzë për abuzim me tokën në qytetin e Milanos. Janë projekte mjaft të rëndësishme, si ndërtimi i një biblioteke europiane apo struktura të rëndësishme të qytetit që janë shfaqur si ndërtesa moderne, mes tyre edhe pylli vertikal. Të gjitha këto janë hetime që vijnë pas një denoncimi të thjeshtë. Drejtësia italiane dhe prokuroria e Milanos hapi një proces hetimor pas denoncimit të një grupi banorësh që jetonin pranë parkut ku çonin fëmijët çdo ditë dhe një ditë panë një vilë historike, që të shembej. Aty bënë denoncim dhe pas dy vitesh hetim u zbulua ky abuzim dhe bëri që Boeri të jetë nën hetim bashkë me 7 persona të tjerë që ndodhen nën hetim dhe në burg. Mes tyre janë ata që jepnin leje ndërtimi apo aprovonin projekte të tilla.
Unë e kam quajtur Tiranën si modeli i Milanos, vetëm se në Itali funksionon drejtësia, që funksionon pas denoncimit të qytetarëve. Ku në Tiranë ka akuza të forta dhe fakte të forta të bërë nga aktivistë të opozitës dhe këshilltarë bashkiakë të opozitës, por kemi një heshtje totale, dhe nuk hetohet abuzimi që i është bërë pronës publike dhe projekteve që duhet t’iu shërbenin qytetarëve.
Stefano Boeri vetëm pak ditë më parë është parë në krah të Kryeministrit Edi Rama duke publikuar librin “Metamorfoza e pyllit vertikal”. Emri i Kryeministrit Rama implikohet me Boerin pasi në vitin 2017 ishte vetë Kryeministri Rama i cili nën pompozitetin e emrit të arkitektit në një event mjaft të kuruar shfaqi masterplanin “Tirana 2030” do të sillte ide të mbrojtjes së arkitekturës së qytetit, shtimit të gjelbërimit të Tiranës apo funksionimit sa më efikas të linjës së transportit të qytetit.
Ishte viti 2017, ndërsa tani jemi në 2025 dhe kemi parë që kjo markë kaq e propaganduar nga Kryeministri Rama, pamë që në Tiranë u përkthye në një abuzim të dhunshëm të pronës publike dhe krijimit të një sistemi klientelist që favorizon vetëm një grup interesi.
Kryeministri Rama e ka ndërtuar pushtetin e tij me një rrjet klientelizmi apo partnerë strategjikë siç i quan ai, që nuk janë gjë tjetër veçse ortakë dhe të afërm të ministrave dhe mbi të gjitha mbi një korrupsion të një niveli mjaft të lartë. Prokuroria milanezë ka sekuestruar telefonat celularë të Stefano Boerit, ku ka pasur mijëra mesazhe me kryetarin e bashkisë së Milanos. Nën motivin e zhvillimit, Kryeministri Rama shkeli jo vetëm VKM zhvillimi, por iu mori tokën pronarëve autoktonë për të ndërtuar kulla. Masterplani “Tirana 2030” është një flluskë dhe ide e një Tirane të betonuar, e projektuar për të rritur vlerën e metrit katror dhe për të fituar ai investitor që është i lidhur me kapitale të errëta.” – tha Alba Kepi.
