Ish-ministrja e Arsimit në Shqipëri, Besa Shahini, ka njoftuar ditën e sotme se do të kandidojë për kryetare të Komunës së Prishtinës në zgjedhjet lokale të Kosovës që pritet të mbahen në vjeshtë. Lajmin e ka bërë me dije vetë Besa Shahini përmes një video të publikuar në profilin e saj në rrjetet sociale.
“Para katër vjetësh jam kthyer për të jetuar në Prishtinë nga Tirana, në një qytet që e dua fort, që ka një potencial të jashtëzakonshëm, por që ka marrë një kahje të gabuar në zhvillimin e vet” – shprehet ish-ministrja e Edi Ramës.
Më tej ajo shpreh shqetësimin për mungesën e hapësirave të gjelbërta dhe betonizimin e Prishtinës, teksa vlen të theksohet fakti se kur ishte ministre e Qeverisë shqiptare, duket se nuk e kishte shqetësim betonizimin e Tiranës.
“Është një qytet kryesisht i mbuluar me beton, pa hapësira të mjaftueshme të gjelbra. Prishtinës i duhet një ndryshim radikal dhe një kahje tjetër zhvillimi. Unë dua të jem pjesë e këtij ndryshimi, andaj në vjeshtë do të garoj për kryetare të komunës në zgjedhjet lokale 2025. Ju ftoj të më bashkoheni që keni sadopak energji në përpjekjen për ndryshim.” – shprehet ajo.
Besa Shahini u emërua si ministre e Arsimit dhe Sportit në Shqipëri në fund të Dhjetorit 2018, kur Edi Rama u detyrua të shkarkonte nga ai post Lindita Nikollën pas protestave të studentëve.
Besa, një nga prurjet “patriotike” të Edi Ramës, si përfaqësuese e Kosovës në qeverinë shqiptare, i ngjante më shumë një lloj pluhuri kozmik, që vjen rrotull kot dhe nuk bën asnjë punë.
Ashtu siç erdhi në krye të Ministrisë, ashtu edhe u largua në Shtator të vitit 2020. Ajo i dorëzoi një dorëheqje formale kryeministrit Edi Rama, pa dhënë asnjë lloj shpjegimi se përse e ndërmori këtë vendim dhe, për më tepër, pa u përballur asnjëherë me llogaridhënie për rrokullisjen që tashmë kishte marrë arsimi shqiptar.
E vetmja gjë që mbahet mend nga Besa Shahini në Shqipëri është momenti i dorëheqjes së saj, me skenarin e gatshëm të dhënë nga lart dhe që duhet ta zbatonte me përpikmëri, duke dhuruar shfaqje para kamerave të ERTV-së (Edi Rama Televizion).
Ajo i shkoi në zyrë Edi Ramës për të pirë një kafe dhe për t’i prezantuar dorëheqjen nga posti i ministres së Arsimit në ditën e parë të nisjes së vitit të ri shkollor, mes pandemisë së koronavirusit dhe kaosit nëpër shkolla.
Bashkë me Besën shkoi në zyrën e Ramës edhe pasardhësja e saj Evis Kushi. Rama rrinte si “pasha” në zyrë, ndërsa përballë kishte dy femra që ndërruan pozitat. Njëra hipi, tjetra zbriti! Në sfond dukeshin pikturat e tij, sa ishte e vështirë të kuptohej nëse ndodheshe në ndonjë paradhomë ku pulsojnë dritat me nuanca të kuqe, apo në zyrën e kreut të një qeverie.
Të fundit në botë për Arsimin/ Dështimi ka një emër dhe disa fytyra
