Numërimi i votave për zgjedhjet parlamentare të 11 votave, nuk po kontestohet vetëm nga opozita, por edhe nga mazhoranca, ku një numër i madh kandidatësh pretendojnë për tjetërsim të votave preferenciale brenda llojit.
Kanë qenë Xhemal Qefalia, Blerina Gjylameti, Etilda Gjonaj, Frrok Gjini, etj, të cilët kanë depozituar shkresat në KQZ ku kërkojnë pamjet filmike të numërimit të votave.
Veç kërkesave në KQZ, një debat ka patur edhe në grupin e WhatsAppit të kandidatëve të PS-së së Tiranës, ku për të qetësuar situatën është dashur ndërhyrja e vetë Edi Ramës.
Mediat së fundmi kannë publikuar edhe mesazhin e plotë që Edi Rama u ka dërguar kandidatëve këtë të hënë, ku u “sugjeron” që të mos e hedhin këtë hap, pra kërkesave për pamjet filmike në KQZ, pasi sipas tij nuk do të ketë ndryshime në rezultat.
Madje duket se Rama ka hallin se sherri mes kandidatëve të PS-së me akuza ndaj njëri-tjetrit për tjetërsim të votave, do të ushqente “qenërinë mediatike”, siç i konsideron ai analistët dhe gazetarët.
“Kam marrë njoftim me trishtim për disa iniciativa individuale, për të kërkuar filmime, rinumërime e ku di unë çfarë tjetër për votën preferenciale!
Natyrisht që s’mund të ndaloj askënd të veprojë me kokën e vet, por, duke qenë se këtu në këtë dritare jemi ende një skuadër – dhe unë dua që kështu të mbetemi – do të këshilloja që të mos i hyhet asaj rruge. Sepse, së pari, humbja e një gare s’duhet të bëhet shkak për të humbur edhe fytyrën, kur në fakt nuk ka asnjë shans, zero, që me gjithë ata sy mbi ekrane, të ketë devijime vote në përmasa që do ta mbushnin hendekun e kujtdoqoftë me ata që kanë dalë fitues – jo me 10 a 20, por me shumë më tepër vota diferencë nga pasuesit në klasifikim.
Së dyti, kjo do të thotë të hidhet hije mbi njerëzit tanë, që kanë qëndruar pafundësisht nëpër tryeza numërimi, e që nuk e meritojnë kurrkund një hije të tillë dyshimi për kontributin e tyre të madh.
E së fundi, përfytyrojeni vetë se sa keq do të ndjehet kushdo që do t’i hyjë kësaj rruge, duke ushqyer qenerinë mediatike, kur në fund, mali i mbarsur mund të mos pjellë as një mi!” – thuhet në mesazhin e Edi Ramës.
“I kam gati emrat për kallëzim”/ Sherr dhe kërcënime për vota, ç’ndodhi në grupin e WhatsApp të PS
SMS-ja/ Rama ndalon kandidatë që të ankohen: Mos dërgoni më kërkesa në KQZ, po na dëmtoni!
