Prokuroria e Sarandës ka njoftuar nisjen e hetimeve për një ngjarje të ndodhur më 27 mars 2025, ku si pasojë e një konflikti mes të miturve, njëri prej tyre, 17-vjeç, mbeti i plagosur.
Sipas njoftimit zyrtar, më datë 28 mars është regjistruar procedimi penal për veprat penale “Plagosje e rëndë me kapërcim të kufijve të mbrojtjes së nevojshme” dhe “Prodhimi, mbajtja, blerja apo shitja pa leje e armëve të ftohta”, kjo e fundit aktualisht pa autor të identifikuar.
Në konflikt janë përfshirë tre persona të mitur, K.C., B.K. dhe XH.B., ndërsa për njërin prej tyre, i konsideruar si në konflikt me ligjin, Prokuroria ka paraqitur kërkesën për vleftësimin e arrestimit në flagrancë dhe caktimin e masës së sigurisë “arrest në shtëpi”. Kjo kërkesë është pranuar nga Gjykata dhe masa vijon të mbetet në fuqi.
Prokuroria ka bërë të ditur se nën drejtimin e saj po vijojnë hetimet intensive, duke u mbështetur në provat e administruara, në përputhje me Kodit e Drejtësisë Penale për të Mitur dhe Kodin e Procedurës Penale, për të zbardhur plotësisht ngjarjen dhe për të përcaktuar përgjegjësitë individuale të të gjithë personave të përfshirë.
Organi i akuzës u bën thirrje qytetarëve dhe mediave të ndjekin me vëmendje zhvillimet e mëtejshme dhe garanton transparencë të plotë mbi ecurinë e çështjes.
