Gazetari Enton Abilekaj ka analizuar dinamikat e fundit të parlamentit shqiptar.
Ai e ka cilësuar këtë 4-vjeçar si një nga më të ngarkuarit, ku sipas Abilekajt, absurditeti që parlamenti i vjetër rimbledhet pas zgjedhjeve tregon problemet e sistemit zgjedhor në vend.
Ai ka vënë në dukje rolin pasiv të qeverisë në debatet parlamentare, duke kritikuar kryeministrin për shmangien e interpelancave. Abilekaj ka theksuar se ministrat ndjekin të njëjtën strategji, duke e reduktuar parlamentin në një arenë sulmesh ndaj opozitës. Ai ka përmendur gjithashtu ligjet e miratuara me emër personi, si rasti i Portit të Durrësit, duke e quajtur këtë një shenjë të kapjes së parlamentit nga qeveria. Sipas tij, pavarësisht kësaj, opozita ka arritur të krijojë një grup parlamentar më të fortë dhe më imponues në dy vitet e fundit.
“Ky 4-vjeçar ka qenë pa dyshim më dinamik nga të gjitha magjistraturat parlamentare, pavarësisht se ndërprerja 2-mujore tani dhe bilanci që bëri kryetarja e parlamentit, në fakt nuk janë mbyllje përfundimtare të legjislaturës, por janë një mbyllje e përkohshme. Çuditërisht, sepse për shkak të një kodi zgjedhor që kemi bërë, pas zgjedhjeve rimbledhim parlamentin e vjetër deri në shtator, që është një absurd i pakuptueshëm.
Megjithatë, ky ka qenë një parlament më dinamik. Filloi me 9 shtatorin e famshëm të 2021, kur u përjashtua Sali Berisha dhe po mbyllet tani.
Kryeministri ka bërë vetëm një interpelancë në 2 vitet e fundit, ndërkohë që të tjerat i ka deleguar.
Kryeministri shkon për të folur, për të mbajtur fjalë dhe për të fyer opozitën në parlament dhe largohet, nuk qëndron asnjë sekondë.
Këtë bëjnë dhe ministrat kryesorë. I vetmi ministër që është në parlament gjithmonë dhe që merret me parlamentin, është ministri i parlamentit, i dedikuar për marrëdhëniet me parlamentin. Ka qenë Spiropali dhe tani është Balla, të cilët merren me replikat për opozitën.
Pra, qeveria shkon në parlament vetëm për të shkarkuar mbi opozitën akuza, jo për të kontrolluar, jo për të shkuar nëpër interpelanca, jo për të korrigjuar vendime.
Ky parlament ka miratuar vendime, ligje me emër personi kur bëhet fjalë për Portin e Durrësit, për shembull. Kështu që mund të themi që ky parlament nuk ka arritur kurrë që të kontrollojë qeverinë, është përdorur nga qeveria, por opozita në 2 vitet e fundit ka arritur t’i japë kuptim jetës parlamentare, duke u bashkuar dhe duke krijuar më në fund një grup parlamentar imponues”, tha Abilekaj per Syri tv.
