Gjithmonë është folur për një përplasje të ashpër brenda llojit në Partinë Socialiste mes Erion Veliajt dhe Belinda Ballukut, ku duket se kjo e fundit ka marrë një fuqi në parti, mbi të tjerët, të deleguar nga Rama.
Tashmë Erion Veliaj ndodhet në burg, por nuk dihet nëse “lufta e ftohtë” me Ballukun do të përfundojë këtu, apo do të ashpërsohet më tej dhe radha që të përfundojë në qeli është e numrit 2 të Qeverisë.
Por, teksa Veliaj përfundoi në burg, Edi Rama, ndryshe nga socialistët e tjerë, i ka dalë në mbrojtje, madje duke sulmuar dhe kërcënuar prej dy ditësh nga mëngjesi në darkë prokurorët dhe gjyqtarët e Strukturës së Posaçme Anti-Korrupsion, madje duke i quajtur edhe “kamikazë të PD”.
Mëngjesin e sotme, u mblodh jashtë radhe dhe grupi parlamentar i PS-së, me justifikimin se deputetja Klotilda Bushka, e cila po ashtu është nën hetim nga SPAK, do të jepte shpjegime fillimisht para partisë.
Por, Bushka foli vetëm pak, me fjalën që iu ndërpre me urdhër të Ramës, i cili vazhdoi më pas vetë me orë të tëra me sulme ndaj drejtësisë dhe se si nuk ishin zbatuar standardet, siç prertendon ai, në rastin e Veliajt.
Por, vajtimet e Ramës për Veliaj dhe sulmet ndaj drejtësisë, Belinda Balluku kishte zgjedhur që t’i injoronte. Siç shihet edhe në foton e mëposhtme, Balluku duket se është e vetmja në sallë që mungon dhe karrigia e saj, pranë Taulant Ballës ku rri si gjithmonë, është bosh.
Por, teksa fillimisht u mendua se ajo mund të ishte jashtë Tirane në ndonjë aktivitet tjetër, rezultoi tjetër gjë. Ajo ka qenë në kryeqytet dhe kjo vërtetohet nga mbledhja e sotme e Këshillit të Ministrave, ku të gjitha vendimet e mbledhjes së sotme mbajnë firmën e saj.
A zgjodhi vetë që të mos shkonte në mbledhjen e grupit parlamentar, apo ishte dakordësuar më parë me Ramën për këtë gjë, kjo nuk dihet, por duket se vërtetoi edhe një herë “luftën” që ka brenda partisë me Veliajn
