Andi Bushati ka qenë i ftuar në emisionin “Të Paekspozuarit” në MCN TV, ku ka folur për deklaratat e Ramës gjatë konferencës së fundvitit në lidhje me hetimet për Erion Veliajn.
Bushati tha se Rama nuk e mbrojti Veliajn, por i frikësohet përsëritjes së precedentit Ahmetaj, pra një largimit të mundshëm të Erion Veliajt i cili më pas mund të flasë siç po bën Arben Ahmetaj nga arratia.
“Nuk mu duk mbrojtje kjo e Ramës. Rama është më tepër ambig. Gjithë fjalimet që ka mbajtur Rama që nga Tahiri, krahasohet me ato që nuk ka marrë vendim se ç’do bëjë. Nga një ana bëhet gati ta lëshojë, nga ana tjetër, po vuan sepse nuk do një Ahmetaj 2. Në ëndrrat më të mira do që Veliaj të shkojë në burg duke thënë se Rama po më mbron. Pra herë bën sikur e lëshon dhe herë sikur e mbron, herë lë përshtypjen se nuk kam ç’bëj më shumë për ty. Nuk ka një mesazh politik kur flet për Veliajn. Ai do më shumë të qetësojë, por edhe vetë mos implikohet. E gjitha i vjen nga frika, precedenti “Ahmetaj 2”, tha Bushati.
Lidhur me fushatën elektorale dhe mënjanimin e Veliajt, Bushati tha se rënia e tij nuk do ta dëmtonte aspak Partinë Socialiste.
“Brenda asaj organizate aty, askush nuk mund të bënte blerjen e burrave me mjekërr dhe mustaqe të Teatrit, e mbani mend si e këputi? Mund ta bënin të tjerët, por vetëm ky e bëri. Pra kishte një lloj talenti Veliaj në shërbimin prej lakeu ndaj autokratit. Në këtë kuptim mendoj se asnjëri nuk i bën Ramës punët e pista si Veliaj, por është ingranzh i zëvendësueshëm dhe PS nuk do e ndjejë fare, makineria do të punojë po njësoj”, tha Bushati.
