Analisti Andi Bushati u shpreh pesimist për fitoren e opozitës në vitin 2025, ku sipas tij, duket e dënuar të humbë zgjedhjet.
Nisur nga ky fakt, Bushati tha në emisionin “Të Paekspozuarit” se opozita të mos futë laramanë në listat e deputetëve, që nesër do te joshen prapë nga paratë e Edi Ramës e të oligarkëve. Sipas tij, nuk duhet opozitë laramane, por opozitë radikale.
“Problemi është këtu që të gjitha këto kanë vlerë kur gara bëhet në një sistem demokratik. Kur nëse heqim këtë premisë, çështja shtrohet, kemi nevojë për një opozitë shumëngjyrëshe, laramane apo kemi nevojë për një bërthamë opozitarizmi radikal.
Unë jam për këtë të dytën, sepse unë mendoj se kjo opozitë është e dënuar të humbë në 2025 dhe, nëse ti fut në këtë frontin opozitar laramanë të të gjtha ngjyrave që nesër do te joshen prapë nga paratë e Edi Ramës, të oligarkëve, ti do të prodhosh të njëjtën fabul që do të nxjerrësh deputetë me vota opozitare, që do të kthehen në parlament si çamët që janë sot vota për Ramën.
Pra, nëse ka një për qind mundësi, që unë s’besoj që kjo opozitë të fitojë në 2025, por duhet një front sa më i gjerë. Në qoftë se ndajmë mendjen që në 2025, me gjithë arsenalin që ka Rama, e ka të shkatërruar betejën, nuk do ketë zgjedhje, atëherë vendi ka nevojë për një bërthamë radikale opozitarizmi. Në kushtet e kësaj nuk duhet opozita laramane, por opozitë radikale”-tha Bushati.
