Dy vëllezër janë arrestuar nga Policia në Dimal, pasi akuzohen për dhunë dhe zjarrvënie.
Në pranga kanë rënë shtetasit Hajdar dhe Adrian Dokaj.
Policia sqaron se këta shtetas gjatë kohës që kanë qenë duke peshkuar janë konfliktuar për motive të dobëta me një 22 vjeçar dhe më pas kanë shkuar në banesën e këtij të fundit dhe i kanë djegur një divan.
“Specialistët e Seksionit për Hetimin e Krimeve të Stacionit të Policisë Dimal kanë arrestuar shtetasit:
H.D., 44 vjeç, për veprat penale “Largimi i të burgosurit nga vendi i vuajtjes së dënimit” dhe “Shkatërrimi i pronës me zjarr”;
A.D., 50 vjeç, banues në Dimal, për veprën penale “Shkatërrimi i pronës me zjarr”.
Arrestimi i këtyre shtetasve u bë pasi dyshohet se gjatë kohës që kanë qenë duke peshkuar, janë konfliktuar fizikisht për motive të dobëta, me shtetasin D. B., 22 vjeç.
Pas konfliktit, shtetasit H. D. dhe A. D. (vëllezër) kanë shkuar në banesën e shtetasit D. B. dhe kanë djegur një divan në ballkonin e banesës së tij.
Në vijim të veprimeve procedurale për këtë rast u referuan materialet në Prokurori, ku nisi procedimi në gjendje të lirë për shtetasin D. B., 22 vjeç, banues në Dimal, për veprën penale “Plagosja e lehtë me dashje”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
