Është tensionuar protesta para Bashkisë së Tiranës ku kërkohet dorëheqja e kryebashkiakut Erion Veliaj pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
Situata është tensionuar, në momentin që këshilltarët e Partisë Demokratike kanë tentuar të futen brenda Bashkisë, por nuk janë lejuar nga policia e cila prej ditës së djeshme kanë “blinduar” këtë institucion, duke shkaktuar tensione dhe përplasje.
Pas këtij momenti, janë shtuar forcat e policisë të cilat janë të shumta dhe kanë krijuar një kordon rreth godinës.
Në mënyrë simbolike protestuesit kanë qëlluar me vezë dhe mollë bashkinë e Tiranës ndërsa vazhdimisht bëjnë thirrje organeve ligjzbatuese që të hetojnë Erion Veliajn i cili sipas tyre nuk duhet të drejtojë më bashkinë e kryeqytetit.
