Qyteti i Vlorës u trondit një ditë më parë (7 janar), pasi shtetasi Gëzim Sinomati, i cili ishte duke pirë cigare në ballkanin e shtëpisë së tij, u vra me snajper.
Ish-Drejtuesi i Lartë i Policisë së Shtetit, Arben Hajdarmataj, i ftuar në “Open” në News 24 është shprehur se atentati i djeshëm mund të jetë kryer për motive hakmarrjeje, duke marrë parasysh inkriminimin e të atit të viktimës dhe një atentat të kryer më herët ndaj xhaxhait të tij.
Ai ka shtuar se vrasja e 22-vjeçarit ka qenë e mirëorganizuar dhe është kryer nga profesionistë me pagesë.
Hajdarmataj ka theksuar se sot grupet kriminale po stërvitin të rinj dhe adoleshentë për të kryer vrasje të kësaj natyre.
“Unë jam i mendimit se nëse ka dalë pista e ngatërresës së objektivit, ky i fundit duhet të jetë brenda familjes. Inkriminimi i babait të tij dhe atentati i mëparshëm ndaj xhaxhait mund të kenë lidhje. Mosha e re e tij përjashton deri në një farë mase pistën e lidhjes me krimin, sa të jetë aq problematik dhe të jetë objektiv për aktivitetin e tij personal. Për shkak të hakmarrjes, mund të ketë qenë objektiv. Qëllimi i grupit kriminal mendoj se është vetëm hakmarrja.
Atentati është i mirëorganizuar dhe gjithçka është bërë e llogaritur. Viktima është ndjekur. Unë medoj se objektivi është brenda fmailjes. Sa i përket shumës, është te mënyra e realizimit. Makina dhe armët nuk janë aq të kushtueshme, por ka qenë siguria që ka kërkuar grupi. Është patjetër një vrasje me pagesë e kryer nga profsionistë.
Kjo nuk ka të bëjë me ish-përdorues të armëve të tilla. Sot grupet stërvisin adoleshentë për të realizuar krime të tilla. Nëse do të marrim ish-punonjës policie apo efektivë të tjerë, janë një numër i pakët jashtë shërbimi”, u shpreh ai.
