Dy shtetas janë arrestuar nga policia në Elbasan, pasi akuzohen për kultivim kanabisi.
Në pranga kanë rënë shtetasit Artur Malja, 36 vjeç dhe Flavjo Dervishi, 23 vjeç, të cilët ishin shpallur në kërkim pasi gjykata ka caktuar masën “arrest me burg”. Të dy këta shtetas akuzohen se janë bashkëpuntorë në kultivimin e rreth 250 bimëve narkotike kanabis.
Gjithashtu, për këto raste, janë vënë në pranga 2 inspektorë pyjesh dhe kryetari i fshatit, për shpërdorim detyre, si edhe 2 shtetas të tjerë, për kultivimin e bimëve narkotike.
“Në zbatim të masave të përcaktuara në planin operacional “Sundimi i ligjit”, specialistët për Hetimin e Krimeve të Komisariatit të Policisë Elbasan duke përdorur dhe metodat proaktive ndaluan shtetasit:
A.M., 36 vjeç, banues në Krujë dhe F. D., 23 vjeç, banues në Tiranë.
Pas hetimeve të thelluara nga strukturat hetimore të DVP-së dhe Komisaraitit të Poclisië Elbasan, nën drejtimin e Prokurorisë së Juridiksionit të Përgjithshëm Elbasan, Gjykata e Shkallës së Parë e Juridiksionit të Përgjithshëm Elbasan bazuar në provat e siguruara nga hetimi ka caktuar për këta 2 shtetas, masën e sigurisë “Arrest në burg”, për veprën penale “Kultivimi i bimëve narkotike”.
Në territorin e fshatit Seltë, njësia administrative Zavalinë, në kuadër të operacionit policor të koduar “Krasta”, përgjatë dy fazave të tij, zhvilluar në muajin qershor, u gjetën në pronë publike, rreth 250 bimë narkotike kanabis, në kultivimin e të cilave dyshohet se janë bashkëpunëtorë shtetasit A. M. dhe F. D”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
