Kryetari i PD-së, Sali Berisha paralajmëroi këtë të mërkurë një përshkallëzim të aksionit opozitar, që siç bëri me dije, do të nisë nga dita e nesërme (e enjte) në seancën plenare të Kuvendit. Vendimi, tha Berisha, u mor nga grupi parlamentar demokrat pas refuzimeve të vazhdueshme nga ana e mazhorancës përmes forcës së kartonit, të nismave ligjore dhe kërkesave për komisione hetimore.
“Pas komisionit parlamentar të djegëseve, ne kemi dërguar deri tani edhe 4 kërkesa për komisione hetimor parlamentare. Që të gjitha më mënyrën më antikushtetuese janë bllokuar në parlament dhe hedhur poshtë si kërkesa”, theksoi Berisha në një takim me strukturat e qarkut Tiranë, në selinë blu.
Ai kujtoi dhe refuzimin nga ana e mazhorancës për të ndryshuar përbërjen e komisionit për reformën zgjedhore, ku PD kërkon zëvendësimin e Enkelejd Alibeaj si bashkëkryetar. Këtë të fundit, Berisha e cilësoi “të blerë” nga Rama.
Gjatë fjalës së tij, dënoi dhe qëndrimet e kryeministrit Edi Rama ndaj Kosovës gjatë samitit të së hënës në Tiranës dhe vizitës së presidentit francez Emanuel Macron. Rama, theksoi Berisha, “është kthyer në një altoparlant të Beogradit”!
Duke u rikthyer te aksioni përshkallëzimi i aksionit opozitar, ai tha se “43 deputetët e PD nisin ditën e enjte, qëndresën e tyre në parlament”.
“Nuk ka më nënshtrime dhe poshtërime nga një horr, nga një kriminel, nga një njeri i cili nuk ka asnjë parim, nga një njeri që është i gatshëm të shesë dhe blejë gjithçka për pushtetin e tij. Ndaj dhe ne do e nisim vetë betejën në parlament për të mos e ndalur më gjer në rivendosjen e të drejtës së votës së lirë të shqiptarëve. Nuk është betejë e lehtë, por është absolutisht e fitueshme. Nuk ia vlen më të konsumojmë kohën me akuza ndaj tij, por të hidhemi në veprim”, shtoi.
Kryedemokrati nuk dha detaje se në çfarë forme do të përshkallëzohet aksioni opozitar në parlament, megjithatë një shembull u dha këtë të mërkurë, teksa deputetët demokratë braktisën në formë proteste mbledhjet e komisioneve parlamentare. Ndërkohë, gjatë mbledhjes së djeshme të grupit parlamentar demokrat, nga disa deputetë u përkrah dhe ideja e hyrjes në një grevë urie.
Kjo lëvizje duket se i paraprin vendimit të fillimit së protestave kombëtare të paralajmëruar më herët nga opozita, që megjithatë ende nuk kanë një datë për nisjen e tyre. Gjatë prononcimeve publike, kryedemokrati Berisha është shprehur se protestat duhet të jenë “të fuqishme dhe të qëndrueshme” me qëllim largimin e qeverisë, që ai e quan regjim të lidhur me krimin.
