Policia e Fierit, në vijim të operacionit policor të koduar “Tempulli”, ka goditur një rast të shitjes në afërsi të shkollave, të lëndëve të dëmshme për shëndetin e nxënësve.
Si rezultat ka vënë në pranga tre persona, më konkretisht shtetasit: Gëzim Xeba, 60 vjeç dhe Romeo Xeba, 27 vjeç, babë e bir, dhe shtetasi Elios Lame, 24 vjeç, banues në Fier.
Ky operacion u ekzekutua pasi një 15-vjeçar ka shkuar npitalin e Fierit në gjendje të rëndë shëndetësore, pasi kishte konsumuar tullumbace me azot.
“Shtetasi Romeo Xeba kishte përshtatur katin e parë të lokalit për përdorim droge, dhe në bashkëpunim me shtetasit Gëzim Xeba dhe Elio Lame, iu shitnin adoleshentëve (nxënësve të shkollave 9-vjeçare), lëndë të rrezikshme për shëndetin (tollumbace me gaz Azot), dhe si pasojë e konsumimit të tyre, një 15-vjeçar ka shkuar në spitalin rajonal të Fierit, në gjendje të rëndë shëndetësore. Ky ambient i cili u bllokua nga Policia, reklamohej nga të arrestuarit, si vend ku fëmijët/adoleshentët luanin lojëra me kompjuterë.
Gjatë kontrolleve, këta 3 shtetas u kapën duke konsumuar lëndë narkotike cannabis sativa, në prezencë të klientëve të tjerë, në dhoma të përshtatura për këtë qëllim, në katin e parë të lokalitl.
Në cilësinë e provës materiale u sekuestruan një bombul me 50 litra azot, një sasi lënde narkotike cannabis sativa, e ndarë në doza, një mjet grirës për të, 250 tollumbace që shërbenin për t’i mbushur me Azot, 4 celularë, një pajisje elektronike për mbushjen e tollumbaceve me gaz dhe një pajisje për konsumimin e lëndës narkotike në formë tymi.
Këta shtetas dyshohet se prej disa muajsh, iu kanë shitur adoleshentëve, tollumbace me lëndë të rrezikshme për shëndetin e tyre (Azot), kundrejt vlerës 350 lekë.” – thuhet në njoftimin e Policisë.
Materialet procedurale i kaluan Prokurorisë së Fierit për veprime të mëtejshme, për veprat penale “Prodhimi dhe shitja e narkotikëve”, “Përshtatja e lokalit për përdorim droge” dhe “Fshehja e të ardhurave”.
