Janë zbardhur detaje të reja nga atentati i regjistruar natën e kaluar nëqytetin e Vlorës, ku u ekzekutua me breshëri kallashnikovi 41-vjeçari Leartiad Keka.
Burime për mediat pranë grupit hetimor bëjnë me dije se fillimisht ai është qëlluar përpara bibliotekës së Vlorës nga një mjet “Audi” i zi tip A6 me targa italiane. Pasi është qëlluar, Koka ka rënë nga motori dhe ka ecur për rreth 100 metra, ndërsa autori e ka ndjekur nga pas edhe është siguruar që ta vrasë. Më pas 41-vjeçari është qëlluar sërish para kishës Ortodokse. Viktima e kishte pikasur se ishte duke u ndjekur nga autorët e krimit. Personi i cili ka qëlluar me kallashnikov ka qenë pasagjer në mjetin tip Audi A6.
Të njëjtat burime bëjnë me dije se në vendin e ngjarjes janë gjetur 28 gëzhoja, që do të thotë se mbi Kekan është zbrazur një karikatori i plotë kallashnikovi.
Autorëve të krimit u janë dashur 12 minuta me automjetin tip “Audi” të zi tip A6 për t’u larguar nga qyteti i Vlorës e më pas për ta djegur atë në aksin Kote-Sevaster. Brenda automjetit të djegur është gjetur edhe kallashnikovi që dyshohet se është përdorur nga autori për të ekzekutuar 41-vjeçarin.
Mësohet se pas atentatit, policia ka shoqëruar 8 persona, që mund të kishin informacione në lidhje me ngjarje. Deri më tani nuk ka as edhe një person të dyshuar si autor të krimit.
Nga policia konfirmohet se kamerat e vendosura në akset rrugore kanë filmuar mjetin. Kamerat nga bizneset, por edhe ato në rrugeëmendohet se mund të ndihmojnë policinë edhe për identifikimin e autorëve.
E vetmja pistë, e cila dyshohet si motiv i krimit është hasmëria. Leartiad Keka rezulton i akuzuar nga drejtësia për një vrasje në bashkëpunim të ndodhur 23 vite më parë.
Referuar një vendimi të Gjykatës së Lartë të vitit 2005, krimi është shënuar më 18 Gusht të vitit 2000 te “Kthesa e Gushajve” pranë Llakatundit.
Në atë ngjarje, që sipas hetimeve të kohës ka qenë një tentativë grabitje, ka mbetur i vrarë Vendim Malaj, ndërsa si autorë janë arrestuar dhe dënuar Leartiad Keka dhe Fjodor Mezyraj, të cilët pas një sage të gjatë gjyqësore kanë fituar pafajësinë.
