Detaje të reja kanë dalë në dritë nga aksidenti që ndodhi një natë më parë në Tiranë, ku u përfshinë 3 automjete.
Blutë bëjnë me dije se aksidenti është shkaktuar nga një 31-vjeçare e cila teksa ishte duke drejtuar mjetin nën efektin e drogës ka humbur kontrollin dhe ka marrë para dy automjete të tjera, dhe është përmbysur në mes të rrugës.
Në pranga ka rënë shtetasja me iniciale A.O.
“Specialistët e Qarkullimit Rrugor arrestuan shtetasen me iniciale A. O., 31 vjeçe, banuese në Tiranë, pasi duke drejtuar automjetin, në efektin e lëndëve narkotike dhe në sens të kundërt me lëvizjen, në rrugën “Haxhi Hysen Dalliu”, ka goditur tre automjete të parkuara, ka humbur kontrollin mbi drejtimin e automjetit dhe për pasojë automjeti ka dalë nga rruga”, njofton policia.
Materialet i kaluan prokurorisë pranë gjykatës së shkallës së parë të juridiksionit të përgjithshëm Tiranë, për veprime të mëtejshme procedurale.
