Emisioni “Stop” trajtoi këtë të premte, më 5 qershor, denoncimin e qytetares Rudina Zaimi, e cila i’u drejtua emisionit “Stop” për një problem të pazakontë.
Ajo pohoi se është martuar me qytetarin Çlirim Zaimi që në vitin 1995, por në regjistrat e gjendjes civile rezulton beqare.
Sipas qytetares Zaimi, ajo është me origjinë nga Maminasi dhe më pas ka qenë banore e Njësisë Administrative nr. 7 në Tiranë. Martesa, sipas saj, është regjistruar në ish-Zyrën e Gjendjes Civile të Njësisë nr. 9, pranë godinës së “Zërit të Popullit”.
Megjithatë, sot ajo nuk rezulton e martuar në asnjë prej regjistrave, ku ka kërkuar informacion. Rudina shprehet, se është interesuar në Maminas dhe në Skrapar, por askund nuk figuron e martuar.
“Kur shkoj për të marr aktin e martesës që m’u desh për punën e pronave në fshat, më thanë nuk figuron këtu, nuk e ke këtu, e ke në Skrapar. Shkoj në Skrapar, nuk e gjej, nuk jam, se e di që e kam bërë në Tiranë.”
Më pas është drejtuar në Njësinë Administrative nr. 7, ku gjithashtu nuk ka gjetur zgjidhje. Dokumenti i vetëm, që disponon është një vërtetim i lëshuar vite më parë nga Njësia nr. 9, ku rezulton e martuar dhe nënë e dy fëmijëve.
“U interesova tek njësia 7 dhe më thanë e ke në Skrapar, u thashë që në Skrapar nuk kam bërë akt martese, e kam bërë në Tiranë edhe pse e kam burrin nga Skrapari.”
Sot, sipas saj, edhe kjo zyrë e mohon ekzistencën e të dhënave. Me humor Rudina thotë, se nuk do, që institucionet ta ndajnë nga bashkëshorti, pasi edhe pas 30 vjetësh e do të shoqin.
“Jam në trung familjeje, jam me dy kalamaj, më është bërë çuni 30 vjeç e tjetri 27. Se di pse s’dal e martuar shyqyr që kam letrën të paktën… Po e dua mi atë burrë, Çlirimin. Po jo mi zemër se s’ më ka ndryshuar mendja fare, jo. Do e mbroj dashurinë me çdo kusht, derisa të gjendet, se përderisa kam letrën origjinale, ç’është kjo? Të ma gjejnë aktin e martesës, ku e kanë çuar? Pse s’po ma japin, çfarë kanë bërë? Kërkoj të figuroj e martuar.”
Në Njësinë Administrative nr. 7, zyrtarët konfirmojnë se kanë ndjekur rastin, por sipas verifikimeve të tyre Rudina nuk rezulton e martuar në sistem.
Sipas tyre, zgjidhja mund të kërkohet vetëm përmes gjykatës. Në Bashkinë e Tiranës vlerësohet, se çështja shkon përtej kompetencave të zyrës lokale dhe se zgjidhja duhet kërkuar pranë Drejtorisë së Përgjithshme të Gjendjes Civile.
Përgjegjësja e zyrës, Gjendja Civile 7:
-Sa të harxhojë kohë poshtë edhe lart, Rudina duhet të vejë në Gjykatë zemër, sepse akti i martesës së Rudinës, nuk është mbajtur fare.
-Odeta, ti ke qenë prezente, që është paraqitur, sepse…
-Në bazë të dokumentacionit të mbledhur nga zyra e gjendjes civile të bashkëshortit të saj, nga verifikimi, që kemi bërë… unë i kam bërë verifikimet shumë të thella, dhe kam konstatuar, që kur ka ardhur transferimi, i shoqi në komunë është beqar. Që do të thotë, unë nuk aludoj, por akt-martese nuk ka! Bashkia e Tiranës, pavarësisht se tek cila, njësia, 8, 9 apo 7, e ka kontrolluar të gjithë arkivën e vitit ‘94, ‘95, ‘96 dhe nuk është gjendur akti. Në këto raste, kur akti nuk gjendet sipas kodit civil, bëhet vërtetim fakti me vendim gjykate.
/Emisioni STOP
