Nga BoldNews.al
Kryetari i Bashkisë së Shkodrës, Benet Beci, ka larguar Sadri Abazin nga tenderi i pastrimit, duke ia dhënë pa garë familjes Kapri nga Pogradeci. Besi është quajtur “mjeshtëri” i tenderëve, pasi në krye të Fondit Shqiptar të Zhvillimit apo të KESH-it ka bërë një rotacion perfekt, duke kënaqur të gjithë. Kësaj herë, me një goditje ka “vrarë” disa zogj, ku i pari i djegur është Sadri Abazi, i cili gjatë kohës së PD-së së Ademit dhe Spahiut fitoi të gjitha procedurat e pastrimit. Por, pas rotacionit të pushtetit në 14 maj, Abazi është “zhdukur”, megjithëse tentoi me çdo kusht për ta bërë tenderin e pastrimit të zonë perëndimore gjatë kohës që Bardh Spahiu drejtonte bashkinë e qytetit veri perëndimor. Por, cilin “kënaqi” Beci me këtë procedurë?! Çuditërisht, fitues i tenderit është firma “REJ”, e cila është në pronësi të z. Luan Kapri, një i afërm i ish-kryebashkiakut të Pogradecit Eduart Kapri. Ndoshta, njohjet e Becit gjatë drejtimit të KESH-it apo FSHZH-së sollën edhe rokadën në tenderat e pastrimit.
Po si e fitoi firma “REJ” tenderin e pastrimit?! A pati garë dhe me çfarë fondi? Redaksia e BoldNews.al ka siguruar dokumentet e kësaj procedure, ku rezulton se në datën 27 qershor 2023, Bashkia e Shkodrës ka shpallur firmën “Rej” sh.p.k, me administrator z. Luan Kapri, si fituese e procedurës “shërbimi i pastrimit zona ‘Perëndimore’”, me një afat 36 muaj. Fondi limit i këtij tenderi ishte 97.260.885 lekë pa TVSH ose me TVSH rreth 1 milionë euro.
“Njoftojmë se, kanë qenë pjesëmarrës në procedurë këta ofertues me vlerat përkatëse të ofruara: Operatori ekonomik ‘Rej’ sh.p.k, me një vlerë 95.124.270 lekë pa TVSH” thuhet në këto dokumente. Pra, oferta e kësaj kompania ka qenë e vetmja, shumë afër fondit limit. Më saktë, oferta e “REJ” ka qenë 2.136.615 lekë (20 mijë euro) më pak sesa fondi limit. Ose sa 98 % e fondit të akorduar!
Në fund të dokumentit, është edhe emri dhe firma e z. Benet Beci, kryetari i ri i Bashkisë së Shkodrës, i cili procedurën e parë të majme e ka dhënë pa asnjë garë. Me vetëm një operator dhe shumë afër fondit limit. Goxha administrator.
Disa javë më parë, BoldNews.al publikoi një investigim me titull “Përse po nxiton Sadri Abazi për të fituar tenderin 1 mln € të pastrimit në Shkodër?!”. Në atë kohë, redaksia kishte informacione se Shkodra po shndërrohen në një “luftë” influencash nga të “fortët”, të cilët po orvaten ku të munden për të marrë një pjesë nga buxheti i asaj bashkie. “Kjo rokadë ka sjellë që të gjithë biznesmenët-politikanë të majtë ta shikojnë për të vjelë ndonjë para’. Pas Benet Becit ishin fortët si Tom Doshi, Agron Çela apo Pëllumb Gjoka. Të tre të akuzuar nga opozita se paguan miliona euro për të blerë vota. Të tre janë me “sy e veshë” nga Benet Beci apo nga Edi Rama për ndonjë “kockë”’ shkruante BoldNews.al.
Më i humburi dilte Sadri Abazi, nëpërmjet firmës së nipit të tij “Alko Impex”. “Paraja s’ka ngjyrë politike, teksa firma ‘Alko…’ ka qenë e preferuara si e Ademit ashtu edhe e Spahisë, pasi i kanë dhënë miliona euro për pastrimit. Por, duket se para Sadri Abazit është ngritur një mur i madh. Atij i duhet të kalojë me radhë Benet Becin, Tom Doshin, Agron Çelën apo Pëllumb Gjokën. Dhe si mund t’i kalojë? Duke ‘detyruar’ Bashkinë e Shkodrës që të shpejtojë procedurën e tenderit të pastrimit, pa u bërë rotacioni në krye të Bashksë” vijonte shkrimi i BoldNews.al, të cilin mund ta lexoni në linkun më poshtë.
Përse po nxiton Sadri Abazi për të fituar tenderin 1 mln € të pastrimit në Shkodër?!
