Nga BoldNews.al
Shkodra po shndërrohet një “luftë” influencash nga të “fortët”, të cilët po orvaten ku të munden për të marrë një pjesë nga buxheti i asaj bashkie. Zgjedhjet vendore të 14 majit sollën rokadën e forcave politike në atë institucion, që deri më sot është drejtuar nga demokratët, ku dy të fundit janë Voltana Ademi dhe Bardh Spahia. Kjo rokadë ka sjellë që të gjithë biznesmenët-politikanë të majtë ta shikojnë për të vjelë ndonjë para’. Pas Benet Becit ishin fortët si Tom Doshi, Agron Çela apo Pëllumb Gjoka. Të tre të akuzuar nga opozita se paguan miliona euro për të blerë vota. Të tre janë me “sy e veshë” nga Benet Beci apo nga Edi Rama për ndonjë “kockë”. Natyrisht, Doshi ka fokusin te tenderat e shëndetësisë, pra fokusi kryesor është Rama. Becin e shikon për të bërë ndonjë favor për bizneset satelite të tij në Shkodër. Ndërkohë, Agron Çela dhe Pëllumb Gjoka e kanë fokusin si te Rama ashtu edhe te Beci. Të dy janë në pritje për të zhvatur qindra mijëra metra katrorë truall në bregdetin e Velipojës dhe të marrin statusin e investitorit strategjik. Me “ndihmë” nga Beci, Çela dhe Gjoka kanë bërë gati letrat dhe shumë shpejt pritet të marrin miratimin. Po kush ka ngelur rrugëve?!
Një nga biznesmenët-politikanë që ka vepruar në Shkodër ka qenë Sadri Abazi, nëpërmjet firmës së nipit të tij “Alko Impex”. Ai ka fituar tendera pastrimi dhe për disa punë në atë qytet, pavarësisht se bashkia drejtohej nga të djathtët. Por, paraja s’ka ngjyrë politike, teksa firma “Alko…” ka qenë e preferuara si e Ademit ashtu edhe e Spahisë, pasi i kanë dhënë miliona euro për pastrimit. Por, duket se para Sadri Abazit është ngritur një mur i madh. Atij i duhet të kalojë me radhë Benet Becin, Tom Doshin, Agron Çelën apo Pëllumb Gjokën. Dhe si mund t’i kalojë? Duke “detyruar” Bashkinë e Shkodrës që të shpejtojë procedurën e tenderit të pastrimit, pa u bërë rotacioni në krye të Bashksë. 5 ditë pas zgjedhjeve lokale të 14 majit, përkatësisht në datën 19 maj 2023, Bashkia e Shkodrës shpalli tenderin me objekt “shërbimi i pastrimit zona ‘perëndimore’”. Në dokumentet që ka siguruar BoldNews.al shkruhet se afati i këtij tenderi është plot 36 muaj, pra 3 vite. 1 vit më pak sesa mandati i Benet Becit në krye të asaj bashkie! Mësohet se fondi limit i marrëveshjes kuadër për 36 muaj është 97.260.885 lekë pa TVSH, ose me TVSH rreth 1 milionë euro. Zarfet do të hapen në bashki në datën 22 qershor 2023, ndërsa në fund të dokumentit shkruhet se kryetari aktual Bardh Spahia ia ka deleguar firmën nënkryetarit Tonin Dedaj. Një formë për të hequr përgjegjësinë, pasi Spahia nuk u votua si kryetar. Por, me këtë lëvizje duket se më i “fituari” është pikërisht Sadri Abazi, i cili me një lëvizje po tenton që të largojë plot 3 “hiena”. Më herët, pjesa më e madhe e këtyre tenderëve të pastrimit në Shkodër janë fituar nga “Alko…”. Dhe, s’ka si të jetë ndryshe edhe kësaj herë, pasi kjo firmë është shpërblyer edhe disa muaj më parë me zgjatje afati të kontratës.
Por, a do t’ia dalë Abazi ta fitojë sërish këtë tender?! Në daljen e fundit publike, Edi Rama “ftoi” në podcastin e tij Benet Becin dhe fenomenin e Big Brother Luiz Ejlli. Ky i fundit i kërkoi Becit pastrimin e qytetit. Menjëherë ndërhyri Rama i cili i tha se, nëse nuk e pastron qytetin, do e fusë Becin në kazan plehrash. Një kërcënim i hapur i Ramës, por që pas gjithë kësaj procedure ka të bëjë me “të fortët” e partisë së tij, që kanë shpenzuar miliona euro. Tashmë, mbetet për t’u parë se kush do të fitojë në Shkodër; Doshi, Gjoka, Çela apo Abazi?
