Sali Berisha deklaroi këtë të Mërkurë se opozita do të kërkojë hetim parlamentar për manipulimet, që sipas tij, janë kryer nga mazhoranca në zgjedhjet lokale. Gjithashtu, kryetari i Partisë Demokratike paralajmëroi protesta.
Qëndrimet i mbajti në një konferencë për gazetarët nga selia blu, para një mbledhje me deputetët demokratë. Berisha shprehu kundërshti për vendimet e fundit të KAS, që nuk aprovoi kërkesat e opozitës për abuzimin e votimit në burgjet e Rrogozhinës dhe Belshit. Votat në këto kuti rezultuan vendimtare për fitoren nga mazhoranca të këtyre bashkive, ndërsa opozita i cilëson joligjore këto qendra votimi.
Në këtë pikë, kryedemokrati hodhi akuza ndaj ministrit të drejtësisë Ulsi Manaj, si dhe anëtarit të KAS Ilir Rusmaili.
“Qendra e votimit në burgun e Rrogozhinës është ngritur pa asnjë vendim, pa asnjë akt, pa asnjë procedurë. Është ngritur në një burg që kishte vetëm 2 vetë dhe u mbush me urgjencë nga krimineli elektoral Ulsi Manja vetëm e vetëm për të ndihmuar me vota kallp kandidatin e PS. Në burgun e Rrogozhinës u dërgua një Edmond i Drejtorisë së Burgjeve, ai do dërgohet në SKAP si kriminel elektoral, i cili kërcënoi të burgosurit se nëse nuk bind këta persona, me emër, do përfundosh në burgun e regjimit special. Në këtë mënyrë, të burgosurit, përveç vëzhguesit, u detyruan të firmosin votat e kërkuara. Por përsëri them këtu, që qendra e votimit nuk është ngritur mbi bazën e vendimeve ligjore, por është ngritur vetëm nga drejtori i burgut që e kishte dhëndër këtë kandidatin socialist, me Ulsi Manjën që është dhe krimineli elektoral në krye të drejtësisë shqiptare. Në këtë mënyrë, ata morën, siç kanë marrë me dhjetëra mandate të tjera, vazhdojnë të marrin mandate të opozitës”, tha Berisha.
I njëjti skenar është përdorur nga krimineli elektoral Ilir Rusmali me urdhër të Edi Ramës, i cili ëndërron të bëhet Avokat Populli, është vepruar me Dumrenë. 40 vota, të gjitha në çdo kriter ligjor të pavlefshme, janë shpallur të pavlefshme nga krimineli elektoral Ilir Rusmali me urdhër të Edi Ramës, për t’i rrëmbyer mandatin Bedri Qypit. Ndërkohë 16 vota janë shpallur të pavlefshme pasi iu ishte vendosur vetëm një votë, kurse vota ku shkruhej me laps të kuq dhe bëheshin shënime, ato ishin për kriminelin elektoral Ilir Rusmali dhe Edi Ramën, të vlefshme. Natyrisht ne do ndjekim çdo procedurë ligjore, përfshi Strasburgun”, shtoi.
Kjo ka vetëm një rrugë, theksoi ai, protesta dhe vetëm protesta.
“Sirenat e një revolte të vërtetë po bien në mbarë vendin. 500 mijë shqiptarë që votuan si idealistë dhe i rezistuan industrisë gjigante të blerjes së votës, nuk u mposhtën nga makineria gjigante e frikësimit të zgjedhësve, janë të gatshëm të mbushin rrugët dhe sheshet e Tiranës dhe të përballen me këtë regjim armik, antikushtetues dhe antikombëtar. Kurrë ndonjëherë ky komb nuk ka qenë në rrezik shkatërrimi se në këtë periudhë. Krahas kësaj, ne do intensifikojmë përpjekjet tona në parlament për të qenë zëri i qytetarëve. Do dorëzohet në parlament kërkesa për hetim parlamentar të këtyre zgjedhjeve”, tha.
Vangjush Dako
Kryedemokrati komentoi arrestimin e Vangjush Dakos, që e quajti “me regji”.
“Organet e drejtësisë janë në kontroll të plotë të qeverisë. E ka marrë vesh çdo shqiptar se në Shqipëri ka drejtësi me regji dhe regjisori i saj është Edi Rama. Çdo ditë fakton dështimin e plotë të reformës së Sorosit në Shqipëri. Lirohet pas kërcënimeve serioze që i bëri Edi Ramës, Saimir Tahiri. Arrestohet njësoj si në romanet e Markezit, Gjush Dako. Njoftohet arrestimi i tij 4 ditë përpara. E bënë këtë për t’ia dhënë mafies në Dubai, ata e dinë. Por një mandat që përflitet 4 ditë rresht, dëshmon se çdo gjë ka këtu, por drejtësi nuk ka. Megjithatë, Gjushit një fjalë do i them, shkove si ai në vresht për kokë të Tahirit. E meriton plotësisht se je kriminel elektoral i dosjes 339. Por nuk është dënuar për këtë ai, as për pallatet që kushtuan dhjetëra jetë njerëz, u zgjodh me lezet padia për falsifikim dhe shpërdorim detyre. Megjithatë është se shkove si ai në vresht për kokë të Saimir Tahirit dhe mirë ta bënë”, tha Berisha.
Tensionet në PD-në e vulës
Në përgjigje të interesit të gazetarëve, ai dënoi dhe dhunën e ushtruar nga mbështetësit e Lulzim Bashës ndaj disa deputetëve që nuk u dakordësuan me qëndrimin e Enkeljed Alibeajt dhe mbështetësve të tij.
Sipas tij, edhe kjo ndodhi është një skenar i Edi Ramës.
“Para se ta mbyll dënoj me forcën më të madhe, gangsterët që kanë kërcënuar gazetarët, të cilët kanë ndjekur gjithë natën një takim, ku ka patur deputetë dhe deputete. Në vend që të falënderohen për sakrificën e tyre, gazetarët janë përballur me sharje, me kërcënime rrugeçërish, për fajin e vetëm se po bënin me sakrifica të vërteta, detyrën e tyre. Nuk jam unë që u sugjeroj atyre se cilin lajm duhet të ndjekin apo jo, por ata në asnjë rrethanë nuk mund të fyheshin apo të kërcënoheshin. Ata që mendojnë se do mbyllin problemet duke fyer dhe kërcënuar gazetarët, janë gangsterë, janë rrugeçërish, nuk kanë asgjë të përbashkët me individë të civilizuar. Po kështu dënoj fyerjet dhe kërcënimet që u janë bërë deputetëve të Kuvendit, akte këto të nj politike dhune, të turpshme që ka në origjinë skenarët e Edi Ramës”, tha Berisha.
