Katër shqiptarë janë përfshirë në një aksident të rëndë në Itali, ku fatkeqësisht dy prej tyre kanë humbur jetën.
Viktimat janë identifikuar si shtetasit B.H dhe D.E, 74 dhe 48 vjeç, nënë e bir. Ngjarja ka ndodhur të premten në Ventimiglia, në zonën e quajtur si mbikalimi i Roverinos.
Në aksident u përfshinë 3 makina, ndërsa të plagosur kanë mbetur 4 persona gjithsej. Shqiptarët udhëtonin me një makinë tip “Opel Astra”. 48-vjeçari ishte pasagjer dhe ishte ulur në sediljen e përparme dhe pas tij gjendej mamaja.
Në makinë në momentin e ngjarjes ndodhej edhe një 28-vjeçar, që i jepte makinës dhe motra e tij, po ashtu të dy shqiptarë. Nga mediat nuk sqarohet nëse të gjithë këta persona kanë pasur lidhje familjare me njëri-tjetrin. Mediat italiane raportojnë se motra është dërguar në spital me dëmtime të rënda, ndërsa shoferi 28-vjeçar ka pësuar dëme të lehta. I plagosur ka mbetur edhe një 46-vjeçar maroken që po i jepte një “Mercedes”-i dhe një 19-vjeçar që udhëtonte me skuter.
Dyshimet e para janë që shkak i aksidentit të jetë bërë shpejtësia e lartë që udhëtonte “Opel”-i. Për këtë arsye kanë nisur hetimet për vrasje në rrugë ndaj 28-vjeçarit. Dyshohet se ai ka humbur kontrollin, është përplasur me barrierën mbrojtëse, më pas me “Mercedes”-in dhe në fund ka prekur skuterin.
