Partizani ka triumfuar 2-0 në derbi përballë Tiranës. Të kuqtë kanë triumfuar në një sfidë ku ndodhi gjithçka, në fushë dhe në tribuna.
Gola të anuluar dhe të shënuar, penallti të anuluara dhe të pritura, e në fund nga një gol në secilën pjesë loje që vendosi një sfidë shumë të ndezur.
Minutat e para u shoqëruan me tension të vazhdueshëm, teksa pas hedhjes së fishekzjarrëve në fushë mbetën të dëmtuar të dy portierët e të dy skuadrave, Bekaj dhe Rexhepi.
Pas rifillimit të lojës, do ishte Christan Mba që do ndizte festën e kuqe në stadium, koordinim perfekt i tij me kokë për të realizuar kështu golin e parë personal në derbi.
Fundi i pjesës së parë do shihte Patrick protagonist. Lojtari i bardhebluve pengohet në zonë dhe arbitri Juxhin Xhaja akordoi penallti por gëzimi zgjati shumë pak, pasi VAR nuk mendoi kështu dhe e anuloi 11-metërshin.
Pjesa e dytë do niste mirë për të besuarit e Shehit, gol i Hasanit por u anulua për pozicion jashtë loje.
Ekipi i Colellas do fitonte penallti në minutën e 60-të, 11-metërshi u mor nga Rrapaj, por u ekzekutua keq nga Bruno Telushi. Fantastik edhe Visar Bekaj në mes të shtyllave, i cili i mohoi golin Telushit.
Në minutën e 80-të, Tedi Cara përfitoi pas një gafe në mbrojtjen kundërshtare, duke dyfishuar shifrat dhe duke vulosur një herë e mirë fatet e derbit.
Kështu kampionati mbetet më i hapur se asnjëherë, Partizani dhe Tirana kanë të njëjtën kuotë pikësh (40’) dhe ndajnë kreun e tabelës së bashku.
Të kuqtë festuan me tifozët e tyre në fund të derbit, duke ndezur edhe më shumë atmosferën në “Air Albania Stadium”.
