Sfida me Erzenin është e një rëndësie të veçantë për Bylisin dhe impenjimi i stafit dhe skuadrës mallakastriote është në shkallën maksimale në prag të duelit që luhet ditën e diel në “Adush Muçaj”.
Mallakastriotët do të kërkojnë kthesën, pasi vijnë në këtë duel pas disfatës në shtëpi me rrogozhinasit, ndërsa optimizmi duket qartë në radhët e djemve të Naxhi Shensoit.
Në seancat e fundit trajneri Shensoi ka punuar shumë sidomos me repartin ofensiv duke u marrë veçmas me sulmuesit dhe duke bërë ushtrime të larmishme ashtu sikundër ka punuar edhe në aspektin psikologjik. Kjo duket se është edhe një strategji se si ballshiotët të shkojnë sa më kollaj te golat.
Mund të jetë disi e çuditshme, por kur janë luajtur plot 23 javë kampionat, skuadra mallakastriote nuk ka marrë ende asnjë penallti në favor, teksa ka arritur që madje edhe t’i anulohet 1 e tillë pikërisht në javën e dytë në Durrës nga VAR-i.
Madje, sipas statistikave, është e vetmja skuadër në Superiore këtë sezon që nuk ka marrë asnjë penallti në favor.
