Vllaznia mori një fitore të rëndësishme për ambiciet e saj për të fituar titullin që i mungon prej 25 vitesh.
Skuadra e drejtuar nga Edi Martinin arriti t’i imponohet skuadrës më në formë të momentit në Kategorinë Superiore, Partizanin duke e mundur në ‘Arenën e Demave’ me rezultatin 2-0 dhe ruan ende kreun e klasifikimit.
Skuadrat shkuan në pushimin e ndeshjes me barazimin 0-0, ndërsa pjesa e dytë nisi me një gol të Partizanit që shënoi me Isgandarlin, një gol që u anulua për pozicion jashtë loje.
Pak çaste më vonë, po këtij futbollisti iu anulua një tjetër gol, ndërsa në fazat e fundit të ndeshjes ishte radha e Dodajt të bëhej protagonist për Vllazninë.
Në minutën e 82, futbollisti i kuqebluve i dha avantazhin Vllaznisë, ndërsa 10 minuta më vonë vulosi përfundimisht fitoren 2-0 për skuadrën shkodrane që shkon në 56 pikë duke ruajtur kreun e klasifikimit, ndërsa Partizani mbetet me 44 pikë në vendin e katërt.
Egnatia-Bylisi
Në ndeshjen tjetër, Skuadra kampione e vendit iu imponua Bylisit duke e mundur me rezultatin 3-0 dhe njeriu i ndeshjes për rrogozhinasit u bë pikërisht Daniel Adjessa, autor i të 3 golave për Egnatian në këtë përballje.
Pas një pjese të parë të vakët dhe të mbyllur me barazimin 0-0, gjërat ndryshuan në 45 minutat e dyta. Pikërisht në këtë fraksion, Egnatia shtoi ritmin e lojës falë edhe aktivizimit të Adjessas që i dha avantazhin skuadrës së tij në minutën e 69.
Pas këtij momenti, Egnatia u duk se mendoi më shumë për menaxhimin e avantazhit, megjithatë në minutat e fundit pas dy kundërsulmeve, rrogozhinasit arritën të gjejnë edhe 2 herë të tjera goli, falë Adjessas që plotësoi tregolëshin personal duke vulosur fitoren për Egnatian që shkon në 54 pikë, ndërsa Bylis mbetet me 30 pikë në vendin e 7 të klasifikimit por tani ndjen hijen e Tiranës që është 2 pikë më pak.
