Elbasani ka marrë një fitore shumë të rëndësishme në garën për “Final Four”, pasi ka mundur një rival direkt si Dinamo për të lënë +5 pikë pas blutë e Ilir Dajës, duke mbetur vetëm një pike larg kreut.
Gjithçka erdhi falë një pjese të parë të shkëlqyer, ku Elbasani shënoi shpejt me Diallo, pas një gafe të Teqjes (5’), rezultat i cili më pas u dyfishua në minutën e 25-të, po nga i njejti lojtar.
Fillimisht Diallo gaboi nga pika e penalltisë, por portieri Teqja nuk arriti ta mbërthente dhe 22-vjeçari senegalez për së dyti do ta shtynte topin në rrjetë për 2-0.
Në vijim, Elbasani mendoi të administronte lojën dhe të thumbonte me kundërsulme, duke shpërdoruar disa herë mundësi të mira për të shënuar një gol të tretë.
Ndërsa nga ana tjetër Dinamo goditi një herë traversën me Teikseira, bëri shumë volum loje në pjesën e dytë, por krijoi pak raste para portës së vendasve, duke dalë kokulur pas humbjes 2-0 që komplikon planet e saj në luftën për titullin.
