Policia e Kukësit ka vënë në pranga ditën e sotme një 32-vjeçar, pasi është kapur duke transportuar emigrant të paligjshëm kundrejt fitimit.
Blutë bëjnë me dije se në prang aka rënë shtetasi me iniciale F.M, i cili në automjetin tip “Kia”, kishte 2 emigrantë, që do të kalonin në mënyrë të paligjshme, nëpërmjet kufirit të gjelbër, drejt Kosovës dhe më pas në vendet e BE-së.
Operacioni u krye pas kontrolleve intensive nga shërbimet e DVP Kukës.
“Strukturat e DVP Kukës, në zbatim të detyrave të përcaktuara në planin e masave për parandalimin dhe goditjen e aktivitetit të paligjshëm të dhënies ndihmë për kalim të paligjshëm të kufijve dhe tranzitimin e tyre në territorin shqiptar, me destinacion vendet e BE-së, goditën një rast të kësaj veprimtarie kriminale. Si rezultat u arrestua në flagrancë shtetasi:
– F. M., 32 vjeç, banues në fshatin Oreshkë, Kukës. Ky shtetas është kapur në flagrancë nga shërbimet e Policisë, duke transportuar kundrejt fitimit, me automjetin tip “Kia”, 2 emigrantë, që do të kalonin në mënyrë të paligjshme, nëpërmjet kufirit të gjelbër, drejt Kosovës dhe më pas në vendet e BE-së. Materialet i kaluan Prokurorisë pranë Gjykatës së Rrethit Gjyqësor Kukës, për veprime të mëtejshme”, thuhet në njoftimin e policisë.
