Pas largimit të dy shtyllave të ekipit, Partizani tashmë mund të quhet një ekip mesatar, që vë në dyshim edhe luftën për titullin kampion. Pa Skukën dhe Bitrin, skuadra e kuqe pëson ndryshime të mëdha në formacion dhe lojtarë, që deri më tani kanë qëndruar në stol, do të thirren në detyrë të paktën për ndeshjen ndaj Teutës, ku edhe në rast se do të ketë afrime të tjera, nuk pritet të aktivizohen.
Kështu, te të kuqtë nga minuta e parë në ndeshjen e së enjtes pritet të luajë Rexhepi në portë, teksa para tij i sigurt është Sota. Qendra tjetër pritet të jetë një mes Menish dhe Sembene, teksa më shumë shanse ka sllovaku për shkak të eksperiencës. Ndërkohë, Marçelino Preka, që është një tjetër lojtar me shumë cilësi në mbrojtje, vazhdon të jetë i dëmtuar dhe do të kthehet vetëm në muajin e ardhshëm. Në, krahë Buxhelaj dhe Hadroj janë të padiskutueshëm.
Mesfusha nuk ndryshon. Matondo luan në qendër, teksa në anë të tij do të vendosen Rrapaj dhe Murataj. Largimi i Skukës në sulm krijon boshllëk të madh, që me shumë mundësi do të plotësohet nga Mensah, i cili shoqërohet nga Cara dhe Hoti, teksa edhe Da Silva është një opsion, pavarësisht se vjen nga një mungesë e gjatë.
