Hakerat iranianë kanë reaguar për sulmin që iu bë kreut të Partisë Demokratike, Sali Berishës gjatë protestës së ditës së sotme nga 31-vjeçari, Gert Shehu.
Hakerat kanë paralajmëruar publikimin e dokumenteve për Shehun. Ata thonë se në ditët në vijim do të nxjerrin të dhënat ku Shehu del në disa databaza të policisë.
Berisha pësoi plagë në fytyrë ndërkohë që agresori u neutralizua nga personat pranë Berishës.
Pas protestës në një deklaratë për mediat Berisha tha pas sulmit, se Shehu është agjent i infiltruar i policisë.
Sipas Berishës, pas tij qëndron ministri i Brendshëm Bledi Çuçi dhe kryeministri Edi Rama. Kreu i PD u shpreh se Edi Rama donte me çdo kusht që ai të mos fliste në protestën e sotme.
“Siç u pa, ishte një akt agresiv kriminal, i një personi që plotëson çdo kusht për të qenë i përdorur. Por ajo që është më flagrante, është se personi është agjent i policisë kriminale. Gerti Shehu është agjent i policisë kriminale, kontingjent që futen me doza të vogla në rrethet e trafikantëve, problem me disa ç’rregullime, por fakti që zyra e Fugës shpërndau me urgjencë këtë dokument shëndetësor për të, dëshmon se gjithçka ishte e përgatitur. Fakti që zyra e tij, e kishte gati shkresën për të ua dhënë gazetarëve. Ju e dini se në raste të tilla këta persona përdoren, se një njeri normal nuk pranon kurrë të përdoret. Edi Rama duke dashur që të paraqesë veten duar jashtë e paraqiti veten 100% duar brenda”, tha kreu i PD-së.
