Mëngjes i trishtë për nxënësit në gjimnazin “Qemal Stafa” në Tiranë.
Pas 15 ditësh nga aksidenti në rrugën e Patokut, ditën e sotme ka mbyllur sytë përgjithmonë 16-vjeçari Flavio Mankollari, nxënës ekselent i kësaj shkolle në kryeqytet.
Gjatë dy javëve adoleshenti qëndroi i shtruar në QSUT, ku shokët dhe të afërmit dhuruan gjak për ta mbajtur në jetë, mirëpo këtë të martë mësohet se Flavio Mankollari ka ndërruar jetë. Gjimnazi “Qemal Stafa” është në zi pasi shokët e Flavios e kanë mbushur bankën e tij me lule të bardha.
“Një nxënës ekselent, një fëmijë i kompletuar, një yll djalë i cili i dha dhe kishte shumë për ti dhënë shoqërisë. Një nxënës që mbylli me 10.0 klasën e 10-të, i cili do të shijonte bursën e ekselencës si një qemals sivjet dhe që gjatë gjithë jetës së tij shkollore nuk njeh një notë 9-të të marrë dhe vetëm sjellje shembullore dhe një zë i ëmbël, i fuqishëm në jetën shkollore, promovues i vlerave dhe virtyteve njerëzore!
Të duam shumë Flavio, do të të kujtojmë gjithmonë me mall në çdo moment të bukur të jetuar për këto kohë që kaluam bashkë! U prehsh në paqe yll i bukur”, thuhet ndër të tjera në mesazhin e ndjerë që gjimnazi “Qemal Stafa”, për ndarjen nga jeta të Flavio Mankollarit.
