Policia e Vlorës ka parandaluar një ngjarje kriminale orët e vona të natës.
Hasan Hasanaj 42-vjeç u arrestua gjatë mesnatës në Vlorë në lagjen “Partizani”. Hasanaj është kapur duke lëvizur me makinë “Porsche” ngjyrë blu pa targa. Ai nuk i është bindur urdhërit të policisë dhe është larguar me shpejtësi. Pas disa minutash ndjekje 42-vjeçari është vënë në pranga në lagjen “Isa Boletini”.
Policia kreu kontrollet ndaj tij dhe rezultoi se ishte në gjendje të dehur ndërsa në fytyrë kishte disa hematoma. Ai mësohet të ketë thënë para efektivëve se ishte konfliktuar me disa persona në një lokal dhe se për këtë arsye kishte vënë maskë dhe kishte hequr targat e mjetit.
Gjatë kontrollit të makinës u gjet një maskë, 1 thikë dhe 2 targa mjetesh, ndërsa gjatë testit të alkoolit rezultoi se ai ishte i dehur në masën 1.410 mgl. Për shkak të lëndimeve të marra, Hasanaj është dërguar në spital për ndihmë mjekësore.
Ndërkohë burime nga policia e Vlorës bëjnë me dije se gjatë ndjekjes personi ka rrezikuar jetën e efektivëve të policisë, duke tentuar ti godasë me automjet.
