Superliga Evropiane nuk është shuar. Gjyqi është mes dhjetorit në Gjykata Evropiane të Drejtësisë për çështjen e monopolit të pretenduar të paligjshëm të UEFA-s dhe FIFA-s.
Aktualisht është presidenti i Barcelonës, Joan Laporta, më aktivi për të mbajtur gjallë manifestin programatik të turneut alternativ të Ligës së Kampionëve, i cili pa dritën në prill të vitit 2021, por që tashmë mbështetet vetëm nga tre klube, Blaugranët, Real Madrid dhe Juventus.
Lajmi është se projekti jo vetëm që po ecën përpara nën rrogoz, por po pajiset edhe me profesionistë të rinj, të thirrur për të vënë në dispozicion përvojën e tyre dhe përmirësuar më tej idenë origjinale të rinovimit të organizimit të garave evropiane.
Në fakt, që nga 19 tetori, Bernd Reichart është CEO i ri i grupit të punës. Gjermani 48-vjeçar ka një karrierë të gjatë si drejtues sportiv dhe deri vonë ka mbajtur pozicionin e CEO të “RTL Deutschland Group”, një nga kompanitë kryesore mediatike në Evropë.
Në planet e “A22 Sports Management”, kompanisë tregtare evropiane të zhvillimit të sporteve, mbi të cilën bazohet Superliga, detyra e Reichart fillimisht do të jetë të fillojë një dialog me ato pjesë të botës së futbollit që për momentin nuk përfshihen në projekt.
Më pas, ndër të tjera, edhe lojtarë, trajnerë, tifozë e media në përgjithësi, për të përfshirë një komunitet gjithnjë e më të gjerë rreth synimeve të Superligës. Këto janë fjalët e “hyrjes” që përdor Reichart:
“Presidentët e Real Madrid, Barcelonës dhe Juventus kanë paraqitur këndvështrimin e tyre për problemet e këtij sporti. Mendoj se po bëjnë pyetjet e duhura dhe personalisht do të doja të dëgjoja shumë zëra të ndryshëm në mënyrë që komuniteti evropian i futbollit të mund të gjejë së bashku përgjigjet e duhura.
Sporti që të gjithë e duam do të përfitojë nga një dialog i sinqertë dhe i hapur, do të ketë një të ardhme më të ndritshme falë reformës sonë të thellë”.
Laporta, në margjinat e ndeshjeve të Ligës së Kampionëve kundër Interit, parashikoi përmirësime të mundshme në projektin e Superligës, duke premtuar lidhje me kampionatet kombëtare:
“Do të ishte gabim nëse Superliga priret të zëvendësojë kampionatet. Nuk mund të luhet gjithmonë vetëm mes klubeve të mëdha, do të lodheshim. Është gjithmonë mirë dhe e shëndetshme kur një skuadër më e vogël mund atë më të madhe. Kur hyra në këtë projekt mendoja për një turne të mbyllur, tani mendoj se Superliga duhet të lidhet me kampionatet e çdo vendi”.
A do të jetë vërtet kështu? Gjithçka do të varet nga vendimi i Gjykatës Evropiane të Drejtësisë, që pritet të dalë në fillim të vitit 2023 për gjoja monopolin e UEFA-s dhe FIFA-s, nga i cili varet fati i Ligës së Kampionëve dhe Superligës, por edhe i gjithë futbollit evropian e botëror.
