Menjëherë pas kallëzimit të bërë nga Partia Demokratike, është kundërpërgjigjur Policia e Tiranës. Nëpërmjet një njoftimi për shtyp, Policia e Tiranës bëne me dije se ka kallëzuar penalisht pranë Prokurorit të Përgjithshëm 9 deputetë për zhvillimin e protestës pa leje si dhe prishje të rrethimit të objektit për ndërtimin e “Këndit të Lojërave”.
Mes deputetëve të kallëzuar është edhe deputeti Gent Strazimiri, por për veprën penale të armëmbajtjes pa leje.
Sipas policisë, deputetët Flamur Noka, Genti Strazimiri, Genc Pollo, Albana Vokshi, Arben Ristani, Asllan Dogjani, Gert Bogdani, Edi Paloka, të shoqëruar nga protestues të tjerë (13 prej tyre të arrestuar ditën e djeshme në flagrancë për veprime të dhunshme), tentuan dhe çanë me forcë kordonin e Policisë Bashkiake, të Policisë së Shtetit me veprime të dhunshme, dokumentuar me prova filmike, raport shërbimi dhe dëshmi të tjera.
Referuar pamjeve filmike, sipas policisë rezulton se deputeti Gent Strazimiri gjatë kohës që ishte në protestë krahas veprimeve të dhunshme ndaj policisë, i dallohej në brez një armë zjarri e llojit pistoletë.
Në deklaratë, policia shton se Strazimiri ka qenë i pajisur me armë zjarri në 26.03.2009, kur ka qenë zv/ministër i Brendshëm.
Por në zbatim të Ligjit nr. 74/2014 “Për armët”, duke filluar nga 26.02.2016, lejet dhe aktet e tjera administrative që japin të drejtën mbi armët, humbasin fuqinë juridike.
Deputeti Strazimiri, nuk ka kryer asnjë veprim për dorëzimin e armës, megjithëse është njoftuar edhe me një shkresë nga Komisariati nr. 3, Tiranë.
Mbi deputetin Gent Strazimiri rëndojnë veprat penale “Organizimi dhe pjesmarrja në grumbullime e manifestime të paligjshme”, “Shkatërrimi i pronës”, “Kundërshtim i punonjësit që kryen një detyrë shtetërore ose një shërbim publik”, “Prishja e qetësisë publike” dhe “Prodhim dhe mbajtja pa leje e armëve luftarake dhe e municionit”, parashikuar nga nenet 262, 150, 235, 274 dhe 278 të Kodit Penal.
