Agjencia e lajmeve “Reuters” ka komentuar protesta e një ditë më parë para parlamentit, ku policia ushtroi dhunë ndaj protestuesve që kërkojnë largimin e kryeministrit Rama.
Në një artikull të saj, “Reuters” shkruan se “Protestat janë një provë për kryeministrin Edi Rama, i cili ka qenë në pushtet që nga viti 2013 dhe të cilin shumë e fajësojnë për moszhdukjen e korrupsionit të përhapur ose për mosbërjen e mjaftueshme shërbimeve bazë si kujdesi shëndetësor”.
Demonstratat janë shoqëruar me tensione, ndërsa policia ka përdorur ujë me presion dhe gaz lotsjellës për të shpërndarë protestuesit që ishin mbledhur para Kuvendit.
Disa prej tyre hodhën vezë dhe miell ndaj forcave të rendit dhe deputetëve, ndërsa sipas mediave shqiptare, tre policë dhe një protestues mbetën të plagosur gjatë përplasjeve.
“Protestat kanë në fokus akuzat për korrupsion dhe mungesë transparence lidhur me projekte zhvillimore përgjatë bregdetit dhe në zona të mbrojtura. Qeveria i ka mohuar këto akuza”, thuhet në shkrim.
Fillimisht, pakënaqësitë u nxitën nga një projekt për ndërtimin e një resorti luksoz të lidhur me Jared Kushner, dhëndrin e ish-presidentit amerikan Donald Trump, por më pas lëvizja u zgjerua duke përfshirë edhe projekte të tjera në zonat bregdetare.
Protestuesit u mblodhën para nisjes së seancës parlamentare, ndërsa tensionet u përshkallëzuan kur ata hodhën vezë ndaj deputetëve dhe policisë. Në orët e pasdites, forcat e rendit ndërhynë me gaz lotsjellës dhe ujë me presion për të shpërndarë turmën.
