Një grup i dyshuar kriminal, i përfshirë në vjedhje banesash dhe automjetesh në Sarandë, është goditur nga Policia.
Gjatë operacionit u arrestuan katër persona, ndërsa një i pestë u shpall në kërkim. Në pranga ranë B. A., 27 vjeç, B. C., 32 vjeç dhe E. D., 30 vjeç, të tre banues në Tiranë, si dhe Sh. D., 33 vjeç, banues në Durrës. Ndërkohë, në kërkim është shpallur O. Sh., 39 vjeç, banues në Fier.
Sipas Policisë, grupi dyshohet se vepronte në bashkëpunim dhe gjatë periudhës 25-27 qershor ka kryer të paktën gjashtë vjedhje të dokumentuara në Sarandë, konkretisht në pesë automjete, të cilave u janë thyer xhamat, dhe në një banesë.
Nga automjetet dhe banesa janë vjedhur shuma parash, laptopë, tableta, sende me vlerë dhe dokumente personale.
Gjatë operacionit, u sekuestrua një laptop, një telefon celular që dyshohet se janë produkte të vjedhura, si dhe një automjet që dyshohet se përdorej nga autorët për kryerjen e vjedhjeve. Materialet procedurale i janë referuar Prokurorisë për veprime të mëtejshme.
