Gjykata e Posaçme kundër Korrupsionit dhe Krimit të Organizuar ka pranuar kërkesën e ish-drejtorit të Bashkisë së Tiranës, Taulant Tusha, duke i zëvendësuar masën e sigurisë nga “arrest në shtëpi” në “detyrim paraqitjeje” në kuadër të dosjes së njohur si “5D”.
Taulant Tushe është një nga emrat e përfshirë në dosjen e bujshme të inceneratorit të Tiranës, një çështje që ka ngritur akuza të rënda për shpërdorim detyre dhe korrupsion në lidhje me procedurat e ndjekura për ndërtimin dhe menaxhimin e inceneratorëve.
Hetimet për këtë dosje janë zhvilluar nga SPAK dhe kanë çuar në arrestime dhe masa sigurimi për disa ish-zyrtarë dhe persona të lidhur me kontratat koncesionare.
Përveç kësaj dosjeje, Tushe rezulton i akuzuar edhe në çështjen e njohur si “5D”, e cila lidhet me dyshime për afera korruptive dhe shkelje të ligjit në tendera dhe projekte publike të zhvilluara nga institucione vendore. Edhe kjo çështje është në kompetencë të Prokurorisë së Posaçme dhe vijon të jetë në fazë hetimi.
Taulant Tusha ka qenë pjesë e PS-së që nga dita e parë e pushtetit. Fillimisht Tusha mbante postin e Drejtorit të Shërbimeve Mbështetëse në Ministrinë për Çështje Sociale dhe Rinisë, të drejtuar nga Erion Veliaj asokohe. Por sapo Veliaj u zgjodh kryebashkiak i Tiranës, Tusha u emërua Drejtor i Punëve Publike në Bashki.
Pas kësaj Tusha ka drejtuar dhe Bordin Drejtues të Ujësjellësit të Tiranës. Por në vitin 2016, në momentin që u krijua Komisioni për koncesionin e mbetjeve, Tusha ishte i dërguari i Veliajt.
Taulant Tusha është kallëzuar penalisht për çështjen e inceneratorit të Tiranës, nga përfaqësuesit e opozitës në Komisionin Hetimor Parlamentar, të ngritur për aferën e Djegësve.
Po ashtu, Aleanca për Mbrojtjen e Teatrit e ka Taulant Tushën në listën prioritare të të kallëzuarve për shkatërrimin e Teatrit Kombëtar.
Gjithashtu, përfaqësues të opozitën kanë kallëzuar Taulant Tushën, si një ndër personat përgjegjës për faturën e fryrë financiare për ndërtimin e shkollës së mesme “Sami Frashëri”.
