Protesta qytetare për largimin e kryeministrit Edi Rama dhe qeverisë së tij ka vijuar sot në Tiranë për të 24-ën ditë radhazi, duke mbledhur sërish dhjetëra qytetarë në qendër të kryeqytetit.
Gjatë tubimit është vënë re edhe prania e ish-zv.ambasadorit të OSBE-së në Shqipëri, Robert Wilton, i cili iu bashkua protestuesve në aktivitetin e zhvilluar këtë pasdite, duke tërhequr vëmendjen e pjesëmarrësve dhe mediave të pranishme.
Ashtu si në ditët e mëparshme, qytetarët u mblodhën fillimisht në Sheshin “Skënderbej”, për të marshuar më pas drejt godinës së Kryeministrisë. Përgjatë marshimit nuk munguan thirrjet kundër qeverisë dhe kërkesat për dorëheqjen e kryeministrit Rama.
Organizatorët e protestës deklaruan se mobilizimi qytetar do të vijojë edhe në ditët në vazhdim, duke theksuar se nuk do të ndalen deri në realizimin e objektivave të shpallura.
Sipas tyre, kërkesa kryesore mbetet largimi i qeverisë aktuale, dorëheqja e kryeministrit Edi Rama dhe ngritja e një qeverie tranzitore që do të çonte vendin drejt zgjedhjeve të reja.
