Parlamenti Evropian ka miratuar me shumicë të gjerë raportin vjetor mbi Turqinë, i cili vëren se distanca e Ankarasë nga parimet, vlerat dhe interesat strategjike të Bashkimit Evropian po zgjerohet.
Raporti u votua pro me 381 vota, ndërsa u regjistruan 107 vota kundër dhe 171 abstenime.
Në të njëjtën kohë, shprehet shqetësim për ruajtjen e ‘casus belli-t’ kundër Greqisë, ndërsa kritika drejtohet edhe për shkeljen e vazhdueshme të sovranitetit dhe të drejtave sovrane të shteteve anëtare të BE-së, në veçanti të Greqisë dhe Qipros.
Teksti, i hartuar nga eurodeputeti socialist spanjoll Nacho Sánchez Amor, kujton se bisedimet e pranimit të Turqisë me BE-në kanë mbetur “të ngrira që nga viti 2018” për shkak të problemeve në fushën e sundimit të ligjit.
Raporti vëren se, për shkak të “mungesës së progresit” dhe “kthimit prapa të demokracisë” në Turqi, “procesi i pranimit të Turqisë në BE nuk mund të rinisë në rrethanat aktuale”.
Referencë e veçantë i bëhet çështjeve të të drejtave të njeriut dhe sundimit të ligjit, me Parlamentin Evropian që e përshkruan situatën si “të tmerrshme” dhe flet për një “kthim prapa demokratik” të vazhdueshëm. Në të njëjtën kohë, vihet re se rregulloret dhe masat legjislative janë ende në fuqi të cilat, sipas raportit, kufizojnë sundimin e ligjit dhe të drejtat themelore.
Për herë të parë, raporti i PE-së kritikon ashpër heshtjen e institucioneve të tjera të BE-së dhe shumë shteteve anëtare të BE-së mbi erozionin e sundimit të ligjit në Turqi, duke u bërë thirrje atyre të jenë ” më të zëshëm” për këtë çështje .
Në të njëjtën kohë, PE-ja i kërkon qeverisë turke, institucioneve të BE-së dhe shteteve anëtare të vazhdojnë të punojnë, përtej procesit të ngrirë të pranimit, drejt një “partneriteti më të ngushtë, më dinamik dhe strategjik”.
Raporti shqyrton marrëdhëniet BE-Turqi përtej procesit të pranimit në fusha me interes të ndërsjellë, duke përsëritur thirrjen e tij për rifillimin e të gjitha dialogëve përkatës të nivelit të lartë për të adresuar sfidat e përbashkëta, të tilla si modernizimi i bashkimit doganor.
Ai gjithashtu thekson rëndësinë e përmbushjes nga Turqia të standardeve të mbetura për rifillimin e procesit të liberalizimit të vizave.
