Kryeministri Edi Rama deklaroi nga Lezha, gjatë festimeve për 35-vjetorin e Partisë Socialiste, se qeverisja socialiste ka ndryshuar imazhin e Shqipërisë në arenën ndërkombëtare dhe ka bërë që vendi të fitojë më shumë respekt.
Në fjalën e tij para socialistëve, Rama pranoi se gjatë viteve të qeverisjes ka pasur gabime, por theksoi se bilanci i përgjithshëm është pozitiv.
“Ne kemi plot të meta, kemi bërë plot gabime. Kur vjen puna te pamja e madhe, është një pamje që flet vetë për ne. Është PS në qeveri sot që ia ka ngritur kokën çdo shqiptari kudo që është. E ka bërë Shqipërinë nga delja e zezë një dekadë më parë në një vend që është më afër se kurrë realizimit të një ëndrre historike”, tha Rama.
Kryeministri foli edhe për përplasjet politike me opozitën, duke u shprehur se socialistët nuk do t’i përgjigjen kundërshtarëve me të njëjtën gjuhë.
Sipas tij, Partia Socialiste udhëhiqet nga vlerat europiane dhe nuk ka zgjedhur rrugën e hakmarrjes politike, pavarësisht sulmeve që, sipas Ramës, janë bërë ndaj tij dhe familjes së tij.
“Kurrë nuk do dëgjoni që unë të flas për familjet e tyre dhe për të vdekurit në shtëpinë e tyre, sepse kjo nuk është europiane, kjo nuk është njerëzore. Në fund është njerëzillëku që ndan PS-në me forcat e tjera politike”, u shpreh kryeministri.
