Një operacion antidrogë i zhvilluar në Padova të Italisë ka çuar në arrestimin e tre shtetasve shqiptarë, të dyshuar si pjesë e një rrjeti të trafikut të narkotikëve.
Gjatë aksionit, autoritetet sekuestruan rreth 2.5 kilogramë kokainë, me një vlerë tregu që arrin të paktën 300 mijë euro.
Hetimet kishin nisur që në orët e vona të 4 majit, kur policia vuri nën vëzhgim tre personat, të cilët u konstatuan duke u takuar dhe duke shkëmbyer një pako me lëndë narkotike. Në pranga ranë një 32-vjeçar dhe një 34-vjeçar, të dy me precedentë penalë, si dhe një 50-vjeçar pa të kaluar kriminale. Ata rezultojnë banues në Padova, Selvazzano Dentro dhe Milano.
Sipas hetuesve, dy prej të dyshuarve u takuan me korrierin e drogës në një furgon, ku u realizua shkëmbimi i një pakete me kokainë. Më pas, policia ndoqi lëvizjet e tyre dhe ndërhyri duke bërë arrestimin në flagrancë. Gjatë kontrollit të mëvonshëm, u zbulua edhe një pako e dytë me mbi 1 kilogram kokainë, e paketuar me kujdes.
Në total, autoritetet sekuestruan rreth 2.5 kilogramë kokainë, e cila, pasi të përpunohej dhe shpërndahej në doza, do të nxirrte mbi 6 mijë doza në treg.
Hetimet zbuluan gjithashtu se 34-vjeçari kishte precedentë penalë, pasi në vitin 2021 ishte dënuar me katër vite burg për posedim droge, ndërsa në vitin 2025 ishte akuzuar sërish për trafik narkotikësh. Edhe 32-vjeçari kishte një të kaluar të ngjashme kriminale, përfshirë dënime për transport dhe shpërndarje droge në sasi të konsiderueshme.
Ndërkohë, 50-vjeçari rezulton pa precedentë penalë.
Pas arrestimit, tre shqiptarët u dërguan në burgun e Padovës, ndërsa ndaj tyre rëndon akuza e posedimit të paligjshëm të lëndëve narkotike me qëllim shpërndarjen.
