Një ngjarje e rëndë është regjistruar në qytetin e Vlorës, ku tre persona kanë kanosur dhe dhunuar një 35-vjeçar në lagjen “Hajro Çakërri”.
Sipas Policisë, ngjarja ka ndodhur një ditë më parë, ku pas një konflikti për motive të dobëta, tre shtetasit: Xh. I., 31 vjeç, K. H., 34 vjeç dhe M. Z., 20 vjeç, kanë kanosur me një pistoletë sportive shtetasin L. S., 35 vjeç, i cili ndodhej brenda automjetit të tij.
Më pas, ata kanë tentuar ta nxjerrin me forcë nga makina, duke e goditur me grushte dhe me tytën e armës.
Si pasojë e dhunës, 35-vjeçari ka marrë dëmtime dhe aktualisht po merr mjekim në spital, jashtë rrezikut për jetën, ndërsa tre autorët janë arrestuar.
Gjatë kontrolleve të ushtruara, Policia ka gjetur të fshehur në një automjet pistoletën sportive që dyshohet se është përdorur në ngjarje. Arma u sekuestrua së bashku me automjetet e përfshira, si prova materiale.
Materialet procedurale i janë referuar Prokurorisë së Vlorës për vijimin e hetimeve, ndërsa ndaj të arrestuarve rëndojnë akuzat për “Kanosje”, “Plagosje të rëndë me dashje”, kryer në bashkëpunim, si dhe “Prodhim dhe mbajtje pa leje të armëve të gjuetisë dhe sportive”.
