Nga Boldnews.al
Në vetëm dy ditë, e dërguara me punë e SHBA-ve në Tiranë, Nancy VanHorn, ka zhvilluar disa takime me zëvendëskryeministren Albana Koçiu dhe ministrat Enea Karakaçi, Besfort Lamallari, Ermal Nufi, Ferit Hoxha, Toni Gogu dhe Erjona Ismaili. Të gjithë ministra të rinj të emëruar së fundmi.
Krejt pa diplomaci, por me thelb të qartë, ambasada e SHBA-ve njoftoi se: “VanHorn ritheksoi përkushtimin e Ambasadës së Shteteve të Bashkuara në zbatimin e agjendës së Shtëpisë së Bardhë të Trump: eliminimin e plotë të karteleve të krimit të organizuar, bindjen e aleatëve të NATO-s për të respektuar angazhimin e tyre të Hagës për shpenzimet në fushën e mbrojtjes dhe marrëveshje të drejta për kompanitë amerikane që bëjnë biznes në Shqipëri”.
Porosia mbet mjaft e qartë, por arsyeja se përse po përsëritet kaq shpesh nuk lidhet me “dëgjuesit” e vëmendshëm tondakokësh anonimë që ende nuk kanë ngrohur karriget, por për numrin një që e ka nxehur prej 13 vitesh karrigen e betonuar. Në diplomaci mesazhi aspak diplomatik përcillet në këtë formë për atë që duhet të dëgjojë. Ai ka emër dhe është kryeministrin Edi Rama.
Pas një viti ftohje të plotë me SHBA-të, Rama shpërtheu nga deliri kur në adresën elektronike të tij mbërriti ftesa nga presidenti Donald Trump për të përfaqësuar Shqipërinë në “Bordin e Paqes”, (një organizëm i krijuar për rindërtimin dhe monitorimin e Gazës në Palestinë).
Gjithashtu ardhja e vajzës së Trump në Vlorë mbi një investim të mundshëm në Ishullin e Sazanit dhe në Zvërnec i dhanë eufori akoma më të madhe kryeministrit i cili ishte në depresion të thellë politik nga ftohja e acartë me SHBA-të. Por lëvizjet e fundit më shumë se një afrim dhe besim i plotë tek qeverisja Rama në gjeostrategjinë amerikane është “plani B” i tyre për ta mbajtur nën presion të plotë, pasi për ta duket mëse i pabesueshëm, por pwr arsye mwse tw kuptueshme po i dalin “borxhit” edhe njw herw.
Në mesazhin e qartë të përfaqësueses amerikane dy janë sugjerimet: “lufta ndaj katreleve dhe krimit të organizuar dhe mbështetja për kompanitë amerikane, sidomos në fushën e mbrojtes. Në politikën e dukshme të Trump qëllimi mbetet dominimi i SHBA-ve nëpërmjet forcës, ekonomisë dhe strategjisë për të lënë në çdo vend ndikimin e tyre. Po a është Rama i gatshëm të luftojë kartelet e drogës dhe krimin e organizuar në vend? A është Rama i gatshëm të afrojë kompani të mëdha, amerikane apo të vendeve të tjera “aleate në letra”?
Kryeministrit po i kërkojnë pikërisht atë që nuk e ka bërë kurrë në 13 vite qeverisje. Bandat, trafikantët dhe bota e errët e krimit të organizuar janë fryma që mban gjallë konceptin e qeverisjes së Rilindjes. Po ashtu nëse i kërkohet kësaj qeverie të përmendë qoftë edhe një emër të vetëm kompanie prestigjioze ndërkombëtare të ftuar në Shqipëri, nuk ka për ta thënë, sepse nuk ka.
Rikërkesa tashmë e dukshme në dy boshte: luftë ndaj krimit dhe kompani ndërkombëtare për investim në Shqipëri, janë të vetmet që Rama nuk mund t’i afrojë, pasi ndryshe do rrezikonte postin që e mban me çdo çmim. Bota e krimit dhe oligarkia prej vitesh janë tashmë jo nevojë për të, por pjesë e qeverisjes. Pas “planit B” nga SHBA-të, ka edhe një tjetër, që do jetë i fundit por edhe fundi i qeverisjes Rama!
