Nga Boldnews.al
Nëse do të bëhej ndonjë sondazh në rrugë se kush është ministri i Brendshëm dhe nëse e njohnin ose jo për fytyrë, e sigurt është se 80 për qind të tyre as do e gjenin, por vetë ministri e quan veten aq të njohur, por edhe shumë të rëndësishëm, sa bën një shfaje që do shkonte taman për titullin “Idioti” i Dostojevskit (vetëm si titull, jo për thellësinë e veprës).
Në ditën kur në selinë e Partisë Socialiste u mblodhën drejtuesit politik të Tiranës dhe po atë mbrëmje mbahej protesta e opozitës, ministri i Brendshëm zbriti nga automjeti dhe pas tij një truprojë mbante armën e shërbimit mbi bluzë në mënyrë të dukshme dhe shumë demonstrative. E gjithë skena ndodhi në sy të dhjetëra qytetarëve që kalonin rastësisht në atë ngushticë mes bankes dhe selisë së PS-së.
Ecja plot pompozitet, në një delir të theksuar dhe vetëkënaqësi të frikshme, e trimëroi Lamallarin e rilindur. Pas tij një patllake lëvizëse qëndronte si skifter në mbrojtje të këtij “personaliteti të madh”, i cili nëse do të kujtohet ndonjëherë sigurisht që do i mbahet mend ai çast kur kryeministri Rama e propozoi si ministër drejtësie dhe gati sa nuk i ra të fikët. Me pak fjalë në gjuhën popullore dhe shkencore “iu tha gjuha” dhe në vështirësi shtrëngoi si lak pas qafës kollaren e tij.
Përtej dukjes, Lamallari si Ministër i Brendshëm e tregoi veten brenda ditës. Në protestën e opozitës gjithçka u përdor me tepri. Gaz lotsjellës me shumicë, ujë me presion nga “autoboot-tanku” i mazhorancës dhe shkopa gome duke mos kursyer as deputetë. Kjo është pasoja e një individi pa të shkuar dhe me gjasë do jetë edhe pa të ardhme politike që i varin në qafë si lak-kollarja e tij çelësat e Ministrisë së Brendshme.
Delirantët deri në kufirin e titullit të vëpres së të madhit Dostojevski forcën e shohin në mjetet e dhunës, ndërsa nuk ngurrojnë të përshfaqen në publik si adoleshentë që sapo kanë dalë nga palestra ku ushtrojnë sportin e artëve marciale. Kusuri i delirantëve po etikë e modesti do shihet në vijim kur dhuna policore do të vijë në shtim, pikërisht nga personazhe që mendojnë se patllakja është mënyra më e mirë për të mbajtur pushtet.
