Detaje të reja kanë dalë në dritë nga operacioni policor i zhvilluar në fshatin Kurtaj, Peqin, ku u zbulua një ambient i përshtatur për kultivimin e bimëve narkotikem në pronësi të Bilal Hasës, drejtor i burgut të Rrogozhinës.
Sipas burimeve zyrtare, gjatë kontrolleve në këtë hapësirë janë konstatuar 1105 vazo me bimë dhe fidanë të dyshuar kanabis, si dhe një sasi e konsiderueshme pajisjesh elektrike që përdoreshin për kultivimin e tyre.
Në vijim të veprimeve hetimore, është arrestuar në flagrancë shtetasi me iniciale E. D., 23 vjeç, banues në Gjocaj, me detyrë faturist i energjisë elektrike, i dyshuar për veprën penale “Shpërdorimi i detyrës”.
Ndërkohë, policia ka shpallur në kërkim katër persona të tjerë:
-
R. H., 30 vjeç, pronar i ambienteve ku u zbuluan bimët narkotike, i dyshuar për “Kultivim të bimëve narkotike”;
-
E. H., 24 vjeç, i afërm i tij, për “Kultivim të bimëve narkotike” dhe “Mbajtje pa leje të armëve të ftohta”;
-
E. M., 36 vjeç dhe D. E., 34 vjeç, të dy përgjegjës në OSHEE, për “Shpërdorim detyre”.
Një ditë më parë është vetëdorëzuar në polici edhe drejtori i burgut të Rrogozhinë, Bilal Hasa, i cili është marrë në pyetje dhe më pas është lënë i lirë, pasi ka dhënë dëshminë e tij lidhur me çështjen. Ai ka deklaruar se ambjenti ishte në pronësi të vëllait të tij dhe se nuk kishte dijeni për aktivitetin e paligjshëm që ushtronte.
Kështu sipas policisë, nga hetimet e kryera rezulton se ambientet ku zhvillohej aktiviteti i paligjshëm ishin në pronësi dhe administrim të vëllait të tij, shtetasit Romario Hasa.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan, ndërsa vijon puna për kapjen e personave në kërkim dhe zbardhjen e plotë të kësaj veprimtarie kriminale.
