Shërbimet e Policisë Kufitare në Morinë kanë arrestuar një shtetas kosovar të shpallur në kërkim ndërkombëtar, i cili tentoi të hynte në Shqipëri.
Sipas njoftimit zyrtar, u bë kapja dhe arrestimi me qëllim ekstradimi i shtetasit F. A., 34 vjeç, banues në Kosovë.
Nga verifikimet e kryera, rezultoi se 34-vjeçari ishte shpallur në kërkim ndërkombëtar nga autoritetet holandeze. Ai ishte dënuar nga Gjykata e Limburgut në Holandë me 1 vit e 6 muaj burgim për veprat penale “pastrimi i parave” dhe “posedimi i lëndëve narkotike të forta”.
Arrestimi i tij u bë në momentin që po tentonte të hynte në territorin e Republikës së Shqipërisë përmes Pikës së Kalimit Kufitar Morinë.
Interpol Tirana, në bashkëpunim me autoritetet homologe në Holandë, po vijon procedurat për ekstradimin e tij drejt vendit ku është dënuar.
